Nobyembre 1
Sabado

Lahat ng mga Banal

Unang Pagbasa: Pag 7:2-4, 9-14
Ikalawang Pagbasa: 1 Jn 3:1-3
Ebanghelyo: Mt 5:1-12a

Nang makita ni Jesus ang makapal na tao, umahon siya sa bundok. Naupo siya roon at lumapit sa kanya ang kanyang mga alagad. At nagsimula siyang magturo sa kanila:
"Mapapalad ang mga may diwa ng dukha sapagkat sa kanila ang Kaharian ng Langit.
"Mapapalad ang mga nagluluksa sapagkat pagiginhawahin sila.
"Mapapalad ang mga di-marahas sapagkat mapapasakanila ang lupain.
"Mapapalad ang mga nagugutom at nauuhaw sa katarungan sapagkat bubusugin sila.
"Mapapalad ang mga maawain sapagkat kaaawaan sila.
"Mapapalad ang mga may busilak na puso sapagkat makikita nila ang Diyos.
"Mapapalad ang mga nagpupunyagi para sa kapayapaan sapagkat tatawagin silang mga anak ng Diyos.
"Mapapalad ang mga pinag-uusig dahil sa katarungan sapagkat kanila ang Kaharian ng Langit.
"Mapapalad kayo kung iniinsulto kayo at pinag-uusig at sinisiraang-puri dahil sa akin. Magsaya kayo at magalak sapagkat malaki ang gantimpalang nasa Diyos para sa inyo. Ganito rin pinag-usig ang mga propetang nauna sa inyo."

Pagninilay-nilay
Sa ibang bansa, bukas pa ang punta ng mga tao sa sementeryo para dalawin ang kanilang mga yumao pero dito sa atin, Todos los Santos, na araw ng lahat ng santo at santa, ang araw na para sa mga yumao nating mga kamag-anak. Bakit nga hindi? Mali bang isipin na nasa langit na nga ang ating mga mahal sa buhay, kasama ng mga anghel at mga banal sa piling ng Diyos?
Sa pagdalaw natin sa sementeryo, nagkakaroon tayo ng reunion hindi lamang sa ating mga yumao kundi tayo mismong mga buháy ay nagkakasama-samang muli sa piling ng ating mga kamag-anak na sumakabilang-buhay. At kasama natin ang Panginoon sa malaking family reunion na ito.

balik calendario

Nobyembre 2
Linggo

Lahat ng mga Pumanaw na Kristiyano

Unang Pagbasa: Kar 3:1-9

Nasa kamay ng Diyos ang kaluluwa ng mga makatarungan at hindi sila makararanas ng anumang pahirap.
Patay sila sa paningin ng mga hangal, at itinuturing na isang kapahamakan ang kanilang pagpanaw. Tila nga nawalan sila ng lahat sa pag-alis sa atin, ngunit nasa kapayapaan sila.
Aakalaing sila'y punarusahan, ngunit ang kanilang pag-asa ay ang buhay na walang hanggan. Mahalaga ang kanilang kinamtan pagkatapos ng kaunting pagtitiis sapagkat sinubok sila ng Diyos at napatunayang karapat-dapat sa kanya; makaraang subukin silang tulad ng ginto sa apuyan, tinanggap sila ng Diyos na waring handog na sinunog.
Pagdating ng paghuhukom magniningning silang parang ningas na gumagapang sa dayami. Maghahari sila sa mga bansa at mamumuno sa mga bayan at ang Panginoon ang kanilang magiging hari magpakailanman.
Makauunawa sa katotohanan ang mga nagtiwala sa kanya at ang mga tapat sa pag-ibig ay mamumuhay na kapiling niya. Sapagkat nakalaan para sa kanyang mga hinirang ang kanyang kagandahang-loob at habag.

Slm 23:1-3, 3-4, 5, 6
Ang Panginoon ay aking Pastol, di ako mangangailangan ng ano man.

Ikalawang Pagbasa: Rom 6:3-9

Alam ninyo na lahat ng bininyagan para mabuklod kay Kristo ay bininyagan at inilubog sa kanyang kamatayan. Sa binyag tayo nalibing kasama ni Kristo, at kung paanong mula sa mga patay, ay ibinangon si Kristo ng luwalhati ng Ama, gayon din naman tayo magbabagong-buhay. Nailarawan na ang pagkahugpong natin sa kanya sa kanyang kamatayan; tularan naman natin ang kanyang muling pagkabuhay.
Alam ninyo na ipinako kasama niya sa krus ang lumang taong nasa atin upang mawala na ang katawang ari ng kasalanan, at hindi na natin paglingkuran ang kasalanan. Kung patay na nga ang sinuman, hindi na siya sakop ng kasalanan, Ngunit kung kasama naman tayong namatay ni Kristo, dapat tayong maniwala na mabubuhay rin tayong kasama niya. Alam natin na hindi na mamamatay si Kristo matapos ibangon. Wala nang kapangyarihan sa kanya ang kamatayan.

Ebanghelyo: Mt 25:31-46

Pagdating ng Anak ng Tao sa kanyang Kaluwalhatian kasama ng lahat niyang mga anghel, uupo siya sa maluwalhati niyang trono. Dadalhin sa harap niya ang lahat ng bansa at parang isang pastol na inihihiwalay ang mga tupa sa mga kambing, gayundin niya paghihiwa-hiwalayin ang mga tao. Ilalagay niya ang mga tupa sa kanan niya at ang mga kambing sa kaliwa.
Sasabihin ng Hari sa mga nasa kanan niya: 'Halikayo, pinagpala ng aking Ama! Manahin ninyo ang kahariang inihanda para sa inyo mula pa sa simula ng daigdig. Sapagkat nagutom ako at inyong pinakain, nauhaw ako at inyong pinainom. Naging dayuhan ako at pinatuloy ninyo ako. Nang ako'y hubad, dinamitan ninyo ako; nang maysakit ako, binisita ninyo ako. Nang ako'y nasa bilangguan, dinalaw ninyo ako.'
At itatanong sa kanya ng mabubuti: 'Panginoon, kailan ka namin nakitang nagugutom at pinakain, nauuhaw at pinainom, isang dayuhan at pinatuloy, at walang suot at dina-mitan? Kailan ka namin nakitang maysakit o nasa bilangguan at nilapitan?' Sasagutin sila ng Hari: 'Talagang sinasabi ko sa inyo: anuman ang gawin ninyo sa isa sa maliliit na ito na mga kapatid ko, sa akin ninyo ginawa.'
Pagkatapos ay sasabihin naman niya sa mga nasa kaliwa niya: 'Mga isinumpa, lumayas kayo sa harap ko tungo sa apoy na walang katapusan na inihanda para sa diyablo at sa mga anghel nito! Sapagkat nagutom ako at di ninyo binigyan ng makakain, nauhaw at di ninyo pinainom, naging dayuhan ako at di ninyo pinatuloy, maysakit at nasa bilangguan at di ninyo binisita.'
Kaya itatanong din nila: 'Panginoon, kailan ka namin nakitang nagugutom, nauuhaw, dayuhan, hubad, maysakit o nakabilanggo, at di ka namin pinaglingkuran?' Sasagutin sila ng Hari: 'Talagang sinasabi ko sa inyo: anuman ang di ninyo ginawa sa isa sa maliliit na ito, hindi ninyo ginawa sa akin.'
At pupunta ang mga ito sa walang hanggang parusa, ngunit sa walang hanggang buhay naman ang mga makatarungan."

Pagninilay-nilay
Kamatayan. Kakambal ng araw ng pagsilang natin sa mundo ang araw ng ating kamatayan. Alam nating lahat ang katotohanang ito-na mamamatay tayong lahat-ngunit hindi natin alam kung kailan, saan at paano. Pero natitiyak natin na talagang darating ang araw ng ating kamatayan.
Sa araw na ito ng mga yumao, tumahimik ka sandali at ilarawan ang araw ng iyong burol at libing. Ano ang itsura mo? Ano ang sinasabi ng iyong mga mahal sa buhay at ng mga dumadalaw sa iyo? May mga pinagsisisihan ka ba dahil may mga hindi ka nagawa noong nabubuhay ka? Ano na ang lagay ng mga bagay na lubha mong pinahahalagahan noong buhay ka?

balik calendario

Nobyembre 3
Lunes

Ika-31 na Linggo ng Taon
Martin de Porres

Unang Pagbasa: Fil 2:1-4
Ebanghelyo: Lc 14:12-14

Sinabi naman ni Jesus sa nag-anyaya sa kanya: "Kung maghahanda ka ng tanghalian o hapunan, huwag mga kaibigan mo o mga kapatid mo o mga kamag-anak o mayayamang kapitbahay ang iyong kumbidahin, baka kumbidahin ka rin nila at susuklian ka. Kung maghahanda ka, mga dukha, mga bale-wala, mga pilay at mga bulag ang kumbidahin mo. At magiging mapalad ka dahil hindi ka nila masusuklian ngunit sa pagkabuhay ng mga mabuti ka susuklian."

Pagninilay-nilay
Masaya si Terry pag nakapagpapakain siya, kaya naman malimit kami noon sa kanila. At kahit na dadalawa lang sila ni Chiara, laging marami siya pag magluto para sa sinumang bisitang maaaring biglang dumating. Para kay Terry, para sa lahat ang pagkain.
Malimit din siyang naghahanda ng mga pagkain at dinadala sa mga lumpong kanyang tinutulungan. Bukod dito, pinatutuloy rin niya sa kanyang bahay ang mga sanggol at mga batang nangangailangan ng tulong hanggang lumakas ang mga iyon at puwede nang iuwi ng kanilang mga magulang. At wala siyang hinihintay na anumang kapalit dahil masaya siya sa kanyang ginagawang paglilingkod.

balik calendario

Nobyembre 4
Martes

Ika-31 na Linggo ng Taon
Carlos Borromeo

Unang Pagbasa: Fil 2:5-11
Ebanghelyo: Lc 14:15-24

Nang marinig ito ng isa sa mga kasalo, sinabi niya kay Jesus: "Mapalad ang makakasalo sa bangkete ng kaharian ng Diyos!"
Sumagot si Jesus: "May taong naghanda ng malaking bangkete at marami siyang kinumbida. Sa oras ng handaan, pinapunta niya ang kanyang katulong para sabihin sa mga imbitado: 'Tayo na't handa na ang lahat.' Ngunit parang sabay-sabay namang nagdahilan ang lahat. Sinabi ng una: 'Bumili ako ng bukid at kailangan kong pumunta para tingnan iyon. Pasensya ka na.' Sinabi naman ng isa: 'Bumili ako ng limang pares na bakang pang-araro at pasusubukan ko ang mga ito. Pasensya ka na' Sinabi ng isa pa: 'Bagong kasal ako kaya hindi ako makakapunta.'
"Pagbalik ng katulong, ibinalita niya ang lahat ng ito sa kanyang panginoon. Galit na galit ang maysambahayan at sinabi sa kanyang katulong: 'Pumunta ka agad sa mga liwasan at mga lansangan ng lunsod, at papasukin mo rito ang mga dukha, mga bale-wala, mga bulag at mga pilay.'
"At pagkatapos ay sinabi ng katulong: 'Nagawa na ang ipinag-utos mo at may lugar pa rin.' Sumagot sa kanya ang panginoon: 'Lumabas ka sa mga daan at mga bakuran at pilitin mong pumasok ang mga tao para mapuno ang bahay ko. Sapagkat sinasabi ko sa inyo: walang sinuman sa mga ginoong iyon na kinumbida ko ang makatitikim ng aking handa.'"

Pagninilay-nilay
Parang sinehan ang mga simbahan pag araw ng Linggo dahil may misa oras-oras. At kasalubong na pumapasok ng mga bagong dating para magsimba ang mga lumalabas sa katatapos na misa. Marami sa ating mga Katoliko ang kuntento nang mapabilang sa mga regular na sumisimba tuwing Linggo dahil busy tayong lahat sa pagtatrabaho sa mga karaniwang araw para sa ating mga pami-pamilya. Kaya wala na tayong panahon para sa iba pang mga mahahalagang gawain.
Hindi lamang sa misa ang hapag na inihanda ng Panginoon dahil para iyon sa pagtatayo ng mas makatao at mas makadiyos na daigdig. At kung hindi tayo makikibahagi, tatawag ng iba ang Diyos bilang kapalit natin.

balik calendario

Nobyembre 5
Miyerkules

Ika-31 na Linggo ng Taon

Unang Pagbasa: Fil 2:12-18
Ebanghelyo: Lc 14:25-33

Habang naglalakad ang napakaraming tao na kasama ni Jesus, humarap siya sa kanila at sinabi: "Kung may dumating sa akin na di nagtatakwil sa pag-ibig sa kanyang ama at ina, at asawa at mga anak, at mga kapatid na lalaki at babae, at maging sa kanyang sarili, hindi siya puwedeng maging alagad ko. At hindi puwedeng maging alagad ko ang di nagpapasan ng kanyang krus sa pagsunod sa akin.
"At paano kung may magbalak magtayo ng silungan ng bantay sa bukid? Di ba't uupo muna siya at tatantyahin ang gastos para malaman kung may sapat siya para maipatapos iyon? Sapagkat kung mailagay niya ang pundasyon at hindi naman niya iyon maipatapos, pagtatawanan lamang siya ng lahat: 'Hayan ang nagsimulang magtayo at hindi na maipatapos.'
"At paano kung may haring makikipagharap sa ibang hari? Di ba't uupo muna siya para mag-isip kung kaya niya at ng sampung libong kasama niya na harapin ang dumarating na may dalawampung libo? At kung hindi naman, malayo pa ang isa ay magpapadala na siya ng mga sugo para makipag-areglo. Gayon din sa inyo. Hindi puwedeng maging alagad ko ang di tumatalikod sa lahat ng kanya."

Pagninilay-nilay
Marami ang nagpupunta pag may bagong bukas na mall o restawran pero paglipas ng mga araw, unti-unti na ring nababawasan ang mga taong nagpupunta roon. Ganito rin ang ningas-kugong pagsunod natin sa Panginoon. Napakasigasig natin sa simula dahil naakit tayo ng ating mga kaibigan pero pagkaraan ng ilang linggo o buwan, unti-unti na tayong tinatabangan kaya binabalikan natin ang dati nating mga kinagawian.
Hindi pansamantala lamang na parang may taning o kontrata ang pagsunod sa Panginoon; paraan ng panghabambuhay na pamumuhay at pagsunod sa Panginoon ang pagiging Kristiyano.

balik calendario

Nobyembre 6
Huwebes

Ika-31 na Linggo ng Taon

Unang Pagbasa: Fil 3:3-8a
Ebanghelyo: Lc 15:1-10

Lumapit kay Jesus ang lahat ng kolektor ng buwis at mga makasalanan para makinig. Kaya nagbulung-bulungan ang mga Pariseo at mga guro ng Batas: "Tinatanggap niyan ang mga makasalanan at nakikisalo sa kanila." Kaya sinabi ni Jesus ang talinhagang ito sa kanila:
"Kung may sandaang tupa ang isa sa inyo at mawala ang isa sa mga ito, hindi ba niya iiwan ang siyamnapu't siyam sa ilang para hanapin ang nawawala hanggang matagpuan niya ito? At pag natagpuan ito'y masaya niya itong pinapasan sa balikat, at pagdating sa bahay ay tatawagin niya ang mga kaibigan at mga kapitbahay at sasabihin sa kanila: 'Matuwa kayong kasama ko sapagkat natagpuan ko na ang nawawala kong tupa.' Sinasabi ko sa inyo: magkakaroon din ng higit na kagalakan sa langit para sa isang makasalanang nagsisisi kaysa siyamnapu't siyam na matuwid na di nangangailangan ng pagsisisi.
"Kung may sampung baryang pilak ang isang babae at nawala ang isa sa mga ito, hindi ba siya magsisindi ng ilaw, magwawalis sa bahay at hahanaping mabuti hanggang matagpuan ito? At pagkakita rito'y tatawagin ang mga kaibigang babae at mga kapitbahay: 'Matuwa kayong kasama ko sapagkat natagpuan ko ang nawawala kong baryang pilak.' Sinasabi ko sa inyo na ganito rin sa mga anghel ng Diyos, magkakaroon ng kagalakan para sa isang makasalanang nagsisisi."

Pagninilay-nilay
Ganito naman ang sabi ng isa sa siyamnapu't-siyam na tupa:
"Baa… baa… baa… Bakit kaya kami iniwan ng aming pastol? Hindi ba niya naisip na baka kung ano ang mangyari sa amin? Paano na kung may dumating na mabangis na hayop? Siyamnapu't siyam kami at sama-sama kaming lahat. Suwerte sana ang mabangis na hayop dahil marami siyang pagpipilian sa amin…
"Mas mahalaga pa ba sa aming pastol ang isang tupang naligaw kaysa sa amin na laging sumusunod sa kanya? Ano kaya kung sadyain kong maligaw para ako naman ang hanapin niya? Baa… baa… baa…"

balik calendario

Nobyembre 7
Biyernes

Ika-31 na Linggo ng Taon

Unang Pagbasa: Fil 3:17-4:1
Ebanghelyo: Lc 16:1-8

Sinabi rin ni Jesus sa kanyang mga alagad: "May katiwala ang isang mayaman, at isinum-bong sa kanya na nilulustay ng katiwala ang kanyang kayamanan. Ipinatawag niya ito at sinabi sa kanya: 'Ano itong naririnig ko tungkol sa iyo? Magsulit ka sa akin ng iyong pangangasiwa dahil hindi ka na makapangangasiwa.'
"At inisip ng katiwala: 'Tatanggalin ako ngayon sa pangangasiwa ng aking panginoon. Ano ang gagawin ko? Kulang ako ng lakas para magbungkal ng lupa, nahihiya naman akong magpalimos. Ah, alam ko na ang gagawin ko. At pagkatanggal sa akin sa pangangasiwa, may mga magpapatuloy sa akin sa kanilang mga bahay.'
"Kaya tinawag niyang isa-isa ang mga may-utang sa kanyang panginoon. Tinanong niya ang una: 'Magkano ang utang mo sa aking panginoon?' Sumagot ito: 'Sandaang galon ng langis.' Sinabi ng katiwala: 'Narito ang resibo mo; maupo ka agad at isulat mo: Limampu.' Tinanong naman niya ang ikalawa: 'At ikaw, magkano ang utang mo?' Sumagot siya: 'Sanlibong takal ng trigo.' Sinabi ng katiwala: 'Narito ang iyong resibo at isulat mo: Walundaan."
"Hinangaan ng panginoon ang matalinong paggawa ng di-matuwid na katiwala. Mas matalino nga ang mga taong makamundo sa pakikitungo sa mga gaya nila kaysa mga tao ng liwanag."

Pagninilay-nilay
Lumilipas at hindi pangmagpakailanman ang pera at kayamanan. At kahit na mawala ang mga ito sa ating buhay, puwedeng kitain nating muli ang mga ito. Walang anumang masama sa pera kung gagamitin natin ito at hindi tayo ang magpapagamit dito.
Mga katiwala lamang tayo at hindi may-ari ng anumang yaman o perang meron tayo sa ating buhay. Dumadaan lang ang mga ito sa ating mga kamay upang ipasa at gamitin para sa kapakanan ng ating kapwa. Ngunit kadalasan sa halip na ipasa natin ito sa iba, dumidikit ang mga ito sa ating mga kamay, tila ayaw kumawala sa ating pagkakahawak at inaangkin na natin ang mga ito.

balik calendario

Nobyembre 8
Sabado

Ika-31 na Linggo ng Taon

Unang Pagbasa: Fil 4:10-19
Ebanghelyo: Lc 16:9-15

Sinabi ni Jesus sa kanyang mga alagad, "Gamitin ninyo ang di-matuwid na Perang-diyos para magkaroon ng mga kaibigan para sa pagkaubos nito'y tanggapin naman nila kayo sa walang hanggang mga tahanan.
"Ang mapagkakatiwalaan sa maliliit na bagay ay mapagkakatiwalaan din sa malalaki, at ang di mapagkakatiwalaan sa maliliit ay di rin mapagkakatiwalaan sa malalaki. Kung hindi kayo mapagkatiwalaan sa di-matuwid na pera, sino ang magtitiwala sa inyo ng tunay na kayamanan? Kung hindi kayo mapagkatiwalaan sa mga bagay na hindi talaga sa inyo, sino pa kaya ang magbibigay sa inyo ng talagang inyo?
"Walang katulong na makapagsisilbi sa dalawang amo; siguradong kamumuhian niya ang isa at mamahalin naman ang isa pa, o magiging matapat sa isa at mapababayaan ang ikalawa. Hindi kayo makapaglilingkod sa Diyos at sa pera."
Naririnig ng mga Pariseo ang lahat ng ito. Sakim sila kaya pinagtatawanan nila siya. At sinabi ni Jesus sa kanila: "Ginagawa ninyo ang lahat para magmukhang mabuti sa paningin ng mga tao ngunit alam ng Diyos ang inyong mga puso. At kasuklam-suklam sa paningin ng Diyos ang mataas sa mga tao."

Pagninilay-nilay
Akala ng marami sa atin na masarap ang buhay ng ating mga kamag-anak na OFW sa ibang bansa. Nabubuhay tayo nang mariwasa at masagana dahil sa ipinapadala nilang pera sa atin buwan-buwan kaya gayon din ang naiisip nating buhay nila sa abroad, kung hindi man masarap kaysa buhay natin dito. Kaya naman kung may anuman tayong kailangan, sulat tayo kaagad sa kanila, o nagpapadala ng email o tinatawagan natin sila sa telepono. Hindi natin alam na halos lahat ng kanilang suweldo ang kanilang inireremit sa atin kaya kung gaano ang pagpipiyesta natin dito, ganoon naman ang pagtitipid nila at pagtitiis sa ibang bansa. Kaya pag-uwi nila sa 'Pinas, walang anumang naipon ang ating mag-anak.

balik calendario

Nobyembre 9
Linggo

Ika-32 na Linggo ng Taon
Pagtatalaga sa Basilika ni San Juan de Letran

Unang Pagbasa: Ez 47:1-2, 8-9, 12

Ibinalik ako ng lalaki sa pasukan ng Bahay at nakakita ako ng tubig na umaagos pasilangan. Nakaharap sa silangan ang Bahay, at sa timog na panig ng altar nagmumula ang tubig. Inilabas niya ako sa hilagang pintuan at inilibot na patungo sa panlabas na tarangkahang nakaharap sa silangan, at nakita ko roon ang agos na nagmumula sa gawing timog.
Sabi niya sa akin, "Pasilangan ang tubig na ito, pababa sa Arabah. Pag nakarating ang tubig na ito sa namamahong dagat, magiging malinis ang tubig ng dagat. Saanman makarating ang agos ng ilog na ito, mabubuhay roon ang maraming isda at mananariwa ang tubig. Magiging masagana ang buhay sa maaabot ng daloy nito.
Malapit sa ilog sa magkabilang panig, sisibol ang lahat ng uri ng namumungang punungkahoy na hindi malalanta at laging magkakaroon ng saganang bunga; mamumunga ang mga iyon buwan-buwan sapagkat dinidilig ng tubig na nanggagaling sa Templo.

Slm 46:3, 4, 5-6, 8, 11
Mayroong isang sapa na ang mga agos ay may dalang galak sa lunsod ng Diyos.

Ikalawang Pagbasa: 1 Cor 3:9c-11, 16-17

Sapagkat sa Diyos, kami ay magkasama sa trabaho. Mga katulong kami ng Diyos, kami ay magkasama sa trabaho. Mga katulong kami ng Diyos at kayo naman ang bukid ng Diyos, o ang itinatayo ng Diyos.
Ayon sa biyaya ng Diyos na ipinagkaloob sa akin, ako ang naglagay ng pundasyon na tulad ng magaling na arkitekto, ito nga ang kakayahang ipinagkaloob ng Diyos sa akin. At iba naman ang magtatayo dito. Mag-ingat lamang ang bawat isa kung paano siya nagtatayo. Hindi puwedeng mailagay ang isang naiibang pundasyon maliban sa nailagay na, si Jesucristo.
Hindi ba ninyo alam na templo kayo ng Diyos at nananahan sa inyo ang espiritu ng Diyos? Kung may wawasak sa templo ng Diyos, wawasakin din siya ng Diyos. Tunay na banal ang templo ng Diyos na kayo mismo.

Ebanghelyo: Jn 2:13-22

Malapit na noon ang Paskuwa ng mga Judio, at umahon si Jesus pa-Jerusalem. Natagpuan niya sa patyo ng Templo ang mga nagtitinda ng mga baka, mga tupa at mga kalapati, at ang mga nakaupong tagapalit ng pera. Kaya gumawa siya ng panghagupit mula sa mga lubid, at ipinagtabuyan ang lahat mula sa Templo, pati ang mga tupa at mga baka, at isinabog ang pera ng mga tagapalit at ipinagtataob ang mga mesa. At sinabi niya sa mga nagtitinda ng mga kalapati: "Alisin n'yo ang mga ito! Huwag n'yong gawing palengke ang Bahay ng aking Ama." Naalaala ng kanyang mga alagad na nasusulat: "Tinutupok ako ng malasakit sa iyong Bahay."
Kaya sumagot ang mga Judio: "Anong tanda ang maipapakita mo sa amin at ginagawa mo ito?" Sinagot sila ni Jesus: "Gibain n'yo ang templong ito, at ibabangon ko ito sa tatlong araw."
Sinabi naman ng mga Judio: "Apatnapu't anim na taon nang itinatayo ang templong ito, at ibabangon mo ito sa tatlong araw?" Ngunit ang templong katawan niya ang kanyang tinutukoy. Nang ibangon siya mula sa mga patay, naalaala ng kanyang mga alagad ang sinabi niyang ito. Kaya naniwala sila sa Kasulatan at sa salitang sinabi ni Jesus.

Pagninilay-nilay
Simbahan. Ito ang salitang ginamit para isalin ang salitang "templo" na tumutukoy sa lugar na pinupuntahan natin para sumamba sa Diyos at sa "iglesya" na pamayanan ng mga naniniwala at sumasamba sa Diyos. Tulad sa salitang "church" sa Ingles, may dalawang kahulugan ng "simbahan."
Bukod sa lugar na ating pinagsisimbahan, ang pagkakabuklod natin bilang mga alagad ni Jesus ang tinutukoy ng Simbahan. Tayo bilang Simbahan ang buháy na katawan ni Jesus sa kasa-lukuyan. Sa pagmamahalan at pagmamalasakit natin sa isa't-isa bilang sambayanan ng Diyos, makikita ng ating kapwa na buháy ngang talaga si Jesus!

balik calendario

Nobyembre 10
Lunes

Ika-32 na Linggo ng Taon
Dakilang Papa San Leon

Unang Pagbasa: Tito 1:1-9
Ebanghelyo: Lc 17:1-6

Sinabi ni Jesus sa kanyang mga alagad, "Hindi maaaring walang katitisuran at magpapabagsak sa tao ngunit sawimpalad ang taong naghahatid nito! Mas makabubuti pa sa kanya na talian ng gilingang-bato sa leeg at ihagis sa dagat kaysa tisurin at pabagsakin ang isa sa maliliit na ito.
"Mag-ingat kayo. Kung magkasala ang kapatid mo, pagsabihan mo siya, at kung magsisi'y patawarin mo. At kung pitong beses siyang magkasala sa iyo sa isang araw at pitong beses din siyang bumalik sa iyo na nagsisisi, patawarin mo siya."
Sinabi ng mga apostol sa Panginoon: "Dagdagan mo ang aming pananam-palataya." Sumagot ang Panginoon: "Kung may pananampalataya kayong sinlaki ng buto ng mustasa, masasabi ninyo sa punong malaigos na iyan: 'Mabunot ka at sa dagat ka matanim,' at susundin kayo nito."