Mayo 1
Huwebes

Ika-6 Linggo ng Pasko ng Pagkabuhay
Jose, Manggagawa

Unang Pagbasa: Gen 1:26-2:3
Ebanghelyo: Mt 13:54-58

Pumunta si Jesus sa kanyang bayan at nagturo sa mga tao sa kanilang sinagoga. Namangha silang lahat at nagsabi: "Saan kaya galing ang kanyang karunungan at natatanging kapangyarihan? Di ba't siya ang anak ng karpintero? Di ba't si Maria ang kanyang ina at sina Jaime, Jose, Simon at Judas ang kanyang mga kapatid? Hindi ba't narito sa piling natin ang lahat niyang kapatid na babae? Ano't nangyari sa kanya ang lahat ng ito?" At bulag sila tungkol sa kanya.
Sinabi naman sa kanila ni Jesus: "Sa kanyang sariling bayan lamang at sambahayan hinahamak ang isang propeta." At kaunti lamang ang ginawa niyang himala roon sapagkat kulang sila sa pananampalataya.

Pagninilay-nilay
Walang anumang makintab na damit ang tunay na San Jose, at lalong wala siyang mga sinag sa ulo. Karaniwan siyang tao, isang ordinaryong karpintero. Sa ating labis na pagpipitagan sa mga banal, tinatakpan natin ng kung anu-anong mga palamuti ang hamak nilang pagkatao hanggang maging mga "super man" sila sa paningin natin.
Sa araw na ito, alalahanin natin ang tunay na San Jose, ang Patron ng mga Karaniwang Manggagawa, na mga taong tunay na malapit sa kalooban ng Diyos. Sila ang hinirang ng Diyos na magturo kanila kung paano mabuhay at magpakatao.

balik calendario

Mayo 2
Biyernes

Ika-6 Linggo ng Pasko ng Pagkabuhay
Atanasio

Unang Pagbasa: Gawa 18:9-18
Ebanghelyo: Jn 16:20-23

Sinabi ni Jesus sa kanyang mga alagad, "Talagang-talagang sinasabi ko sa inyo, iiyak kayo at tataghoy, at magagalak naman ang mundo. Maninimdim kayo ngunit magiging kagalakan ang inyong paninimdim. Naninimdim ang babaeng malapit nang manganak sapagkat sumapit na ang kanyang oras. Ngunit pagkasilang sa sanggol, dahil sa galak ay hindi na niya naaalaala ang kagipitan: isang tao ang isinilang sa mundo.
Gayon nga rin kayo naninimdim ngayon. Ngunit muli ko kayong makikita at magagalak ang inyong puso, at walang makaaagaw ng inyong kagalakan sa inyo. At sa araw na iyon, wala na kayong itatanong sa akin sapagkat talagang-talagang sinasabi ko sa inyo na ipagkakaloob sa inyo anumang hingin ninyo sa Ama sa Ngalan ko."

Pagninilay-nilay
Nagmimisyon ako noon sa mga nayon sa isang bayan sa Quezon at para sa mga tagaroon, sa kabila ng kabila pang bundok ang ibig sabihin ng "diyan lang." Dinadalaw ko ang mga tahanan at nakikituloy kung saan ako patuluyin upang doon manalangin kasama ng kanilang mag-anak pagsapit ng gabi. May nag-iisang bahay sa tuktok ng isang burol, na sa ibaba'y parang malapit lamang, pero mahigit na kalahating oras kung lalakarin ang layo. Kaya sa init ng araw sa tanghali, naroon akong naglalakad papunta sa tuktok ng halos kalbong burol. Pawisan ako, gutom at uhaw na uhaw. Pero pagsapit ko sa bahay sa tuktok, tamang-tama naman dahil nagluluto sila ng puto. Salamat sa Diyos!

balik calendario

Mayo 3
Sabado

Felipe at Santiago, mga Apostol

Unang Pagbasa: 1 Cor 15:1-8
Ebanghelyo: Jn 14:6-14

Sinabi ni Jesus: "Ako siyang daan, ang katotohanan at ang buhay. Walang nakalalapit sa Ama kundi sa pamamagitan ko. Kung kilala ninyo ako, makikilala rin ninyo ang aking Ama. Ngunit ngayon, kilala n'yo na siya at nakita ninyo siya."
Sinabi sa kanya ni Felipe: "Panginoon, ipakita mo na sa amin ang Ama at sapat na sa amin." Sinabi sa kanya si Jesus: "Ang tagal na panahon n'yo akong kasama at hindi mo pa ako kilala, Felipe? Sa pagkakita sa akin ninuman, ang Ama ang nakikita niya. Paano mong masasabing 'Ipakita mo sa amin ang Ama'?
"Hindi ka ba naniniwalang nasa Ama ako at nasa akin ang Ama? Hindi sa ganang sarili ko ipinangungusap ang mga pananalitang sinasabi ko sa inyo. Sa akin nama-malagi ang Ama at siya ang gumagawa ng kanyang mga gawa. Maniwala kayo sa akin na nasa Ama ako at nasa akin ang Ama. Kung hindi, maniwala kayo dahil man lamang sa mga gawa.
"Talagang-talagang sinasabi ko sa inyo, magagawa rin ng nananalig sa akin ang mga gawang ginagawa ko at mas dakila pa kaysa mga ito ang gagawin niya. Sapagkat sa Ama ako papunta. Anumang hingin n'yo sa Pangalan ko'y gagawin ko upang luwalhatiin ang Ama sa Anak. At kung may hingin kayo sa akin sa Pangalan ko, gagawin ko."

Pagninilay-nilay
Hindi makabasag pinggan si Brother Cito. Lagi siyang tahimik at walang imik, bihirang ngumiti at lalo namang hindi siya tumatawa dahil para sa kanya, sa Diyos dapat laging nakatuon ang kanyang isipan. Makasalanan ang tingin niya sa mundo kaya ayaw niyang magkaroon ng kaugnayan dito liban sa mga talagang kailangan niya para mabuhay. Kung minsan nga'y naiinggit siya sa mga anghel at pinapangarap na naging anghel sana siya.
Ngunit naging tao at nagpakatao ang Diyos kay Jesus, na kanyang Anak at ating Paginoon. Hindi niya piniling maging anghel. At siya ang Daan ng totoong buhay na gusto para sa atin ng Diyos-ang magpakatao!

balik calendario

Mayo 4
Linggo

Pag-akyat ng Panginoon

Unang Pagbasa: Gawa 1:1-11

Sa unang aklat, Teofilo, tinalakay ko ang lahat ng ginawa at itinuro ni Jesus mula sa simula hanggang sa araw na iniakyat siya. Ngunit sa pamamagitan ng Espiritu Santo, tinagubilinan niya ang mga apostol na kanyang pinili.
Pinatunayan niya sa maraming pagkakataon na siya ay buhay matapos siyang maghirap. Napakita siya sa kanila sa loob ng apatnapung araw at nagturo siya sa kanila ng tungkol sa Kaharian ng Diyos. Minsang salu-salo sila, inutusan niya sila: "Huwag kayong umalis sa Jerusalem, hintayin ninyo ang pangako ng aking Ama. Ito ang tinutukoy ko nang sabihin ko sa inyo: nagbinyag sa tubig si Juan, pero sa loob lamang ng ilang araw ay bibinyagan kayo sa Espiritu Santo."
Nang minsang magkakasama sila, itinanong nila sa kanya: "Panginoon, sa oras na ito mo ba itatayong muli ang Kaharian ng Israel?" Sumagot siya: "Hindi para sa inyo ang malaman ang mga panahon o araw na itinakda ng Ama sa sarili niyang kapangyarihan. Ngunit palalakasin kayo pagdating sa inyo ng Espiritu Santo, at kayo ang magiging mga saksi ko sa Jerusalem, sa buong Judea, pati sa Samaria, at hanggang sa dulo ng daigdig."
Pagkasabi niya nito, iniakyat siya habang nakatingin sila, hanggang ikubli siya ng ulap at mawala sa kanilang paningin.
Nakatitig pa sila sa langit nang may tumayong dalawang lalaking nakaputi sa tabi nila at nagsabi: "Mga taga-Galilea, bakit kayo nakatingala sa langit? Itong Jesus na kinuha sa inyo at iniakyat sa langit ay babalik din sa inyo, kung paano ninyo siya nakitang pumunta sa langit."

Slm 47:2-3, 6-7, 8-9
Ang Diyos ay umaakyat nang buong saya sa saliw ng mga trumpeta.

Ikalawang Pagbasa: Ef 1:17-23

Bigyan nawa kayo ng Diyos na Ama ni Jesucristong Panginoon ng karunungan at pag-katuklas na bunga ng Espiritu upang lubusan ninyo siyang makilala.
Liwanagan nawa niya ang inyong mga kalooban upang malaman ninyo kung ano ang aasahan ninyo sa pagkatawag niya sa inyo, kung ano ang kayamanan ng maluwalhati niyang pamana sa mga banal, at kung ano ang sobra-sobra niyang lakas alang-alang sa atin na naniniwala.
Ganoon nga ang lakas ng kanyang kapangyarihan, na muling bumuhay kay Kristo at nagluklok sa kanyang kanan sa langit, sa ibabaw ng lahat ng Pamunuan, Kapangyarihan, Lakas, Kapanginoonan at ng anumang maypangalan at kinikilala hindi lamang sa mundong ito kundi pati na sa darating: ipinailalim ng Diyos ang lahat sa kanyang paanan. At inilagay naman siya sa itaas ng lahat bilang ulo ng Iglesya. Ang Iglesya nga ang katawan niya, at sa Iglesya natatagpuan ang kabuuan niya na siyang lubusang pumupuno sa lahat.

Ebanghelyo: Mt 28:16-20

Pumunta naman sa Galilea ang labing-isang alagad, sa bundok na itinakda ni Jesus. Pagkakita nila sa kanya, sumamba sila, ngunit may nag-aalinlangan pa.
At nilapitan sila ni Jesus at sinabi: "Ibinigay sa akin ang buong kapangyarihan sa langit at sa lupa. Kaya humayo kayo at gawing mga alagad ang lahat ng bansa. Binyagan sila sa Ngalan ng Ama at ng Anak at ng Espiritu Santo, at turuan sila na sundin ang lahat ng iniutos ko sa inyo. Kasama ninyo ako sa lahat ng araw hanggang sa wakas ng panahon."

Pagninilay-nilay
Akyat. Umaakyat tayo mula sa silong papunta sa ikalawang palapag, na siyang tinatawag na "bahay" noong araw dahil mga alagang hayop at kung anu-anong mga gamit ang matatagpuan sa silong ng bahay.
Sa pag-akyat ni Jesus sa langit, umakyat siya hindi sa outer space kundi mas maiintindihan natin ito bilang "pag-uwi" sa bahay ng Ama-"umakyat siya sa bahay ng Diyos"!
Sa pag-akyat niya sa langit, taglay niya ang ating pagkatao, na dahil sa kanya'y naging buo at ganap ayon sa orihinal na kalooban ng Diyos para sa tao. At doon sa piling ng Ama, hinihintay niya ang ating pag-uwi sa Diyos.

balik calendario

Mayo 5
Lunes

Ika-7 Linggo ng Pagkabuhay

Unang Pagbasa: Gawa 19:1-8
Ebanghelyo: Jn 16:29-33

Sinabi ng mga alagad ni Jesus: "Hayan, lantaran ka na ngayong nangungusap, at hindi na sa paghahambing nagsasalita. Alam na namin ngayon na alam mo ang lahat at hindi mo kailangang may magtanong pa sa iyo. Dahil dito kaya naniniwala kaming sa Diyos ka galing."
Sumagot sa kanila si Jesus: "Naniniwala ba kayo ngayon? Narito't may oras na sumasapit at sumapit na upang mangalat kayo-bawat isa sa sariling kanya-at iiwan n'yo akong nag-iisa. Ngunit hindi ako nag-iisa sapagkat kasama ko ang Ama.
"Sinabi ko sa inyo ang lahat ng ito upang sa akin kayo magkaroon ng kapayapaan. Kagipitan ang meron kayo sa mundo pero lakasan n'yo ang loob, napagtagumpayan ko ang mundo."

Pagninilay-nilay
May mga batang takot sa dilim at takot din na mapag-isa. Hindi sila mapalagay kaya umiiyak sila at tinatawag ang kanilang mga ina o ama, o sinumang malapit sa kanila. Pagdating naman ng kanilang mga magulang, kahit na walang anumang nabago sa kanilang kalagayan maliban sa pagdating ng kanilang hinahanap, naglalaho lahat ng takot at pangamba.
Ganito kaya ang nadarama nating pangangailangan sa Diyos? Sa Diyos ba tayo nakakatagpo ng lakas at kapanatagan ng loob? Ngunit hindi natin kailangang tawagin pa o hanapin ang Diyos dahil lagi natin siyang kasama at hindi niya tayo iniiwang mag-isa.

balik calendario

Mayo 6
Martes

Ika-7 Linggo ng Pagkabuhay

Unang Pagbasa: Gawa 20:17-27
Ebanghelyo: Jn 17:1-11a

Pagkasabi ni Jesus ng mga ito, tumingala siya sa langit at nagsabi: "Ama, sumapit na ang oras. Luwalhatiin mo ang iyong Anak upang maluwalhati ka ng Anak dahil ibinigay mo sa kanya ang kapangyarihan sa bawat tao upang bigyan niya ng buhay magpakailanman ang lahat ng bigay mo sa kanya. Ito naman ang buhay magpakailanman: ang makilala ka, ang tanging totoong Diyos at si Jesucristong sinugo mo.
"Niluwalhati kita sa lupa, ginanap ko ang gawang bigay mo sa akin para trabahuhin. At ngayon, luwalhatiin mo ako, Ama, at ibigay sa aking katabi ang luwalhating meron ako sa tabi mo bago pa man nagkaroon ng mundo.
"Ipinahayag ko ang pangalan mo sa mga taong kinuha mo sa mundo at ibinigay sa akin. Iyo sila at sa akin mo sila ibinigay, at tinupad nila ang iyong salita. Ngayon, nakilala na nila na sa iyo galing ang lahat ng ibinigay mo sa akin. Totoo, ibinigay ko sa kanila ang mga pananalitang ibinigay mo sa akin, at tinanggap nila at kinilalang totoong sa iyo ako galing at naniwala sila na ikaw ang nagsugo sa akin.
"Sila ang ipinapakiusap ko. Hindi ang mundo ang ipinapakiusap ko kundi ang mga ibinigay mo sa akin dahil iyo sila. Iyo ang lahat sa akin, at akin naman ang iyo, at naluwalhati ako sa kanila. Wala na ako sa mundo ngunit nasa mundo pa sila habang papunta ako sa iyo. Amang banal, ingatan mo sila sa iyong Pangalang ibinigay mo sa akin upang maging isa sila gaya natin."

Pagninilay-nilay
Kung sa kamatayan nagwawakas ang buhay, mas kawawa pa tayo sa mga hayop. Kung ilang taon ang kailangan natin bago tayo natutong lumakad, magsalita at gumawa. Kulang-kulang na dalawampung taon tayong nag-aral para matuto at pagkatapos ay makapagtrabaho. Kung ilang pung taon din tayong naghirap sa pagtatrabaho. Bukod sa lahat ng ito, maraming taon din ng ating buhay ang ginugol natin para sa ating mga mahal sa buhay. Minahal natin sila, inaruga at pinagmalasakitan sa loob ng mahabang panahon!
At maglalaho lamang ba na parang bula ang lahat ng ito? Kung ganito kahalaga ang buhay, hindi ito maaaring magwakas lamang sa kamatayan.

balik calendario

Mayo 7
Miyerkules

Ika-7 Linggo ng Pagkabuhay
Juan Bautista de la Salle

Unang Pagbasa: Gawa 20:28-38
Ebanghelyo: Jn 17:11b-19

Sinabi ni Jesus: "Wala na ako sa mundo ngunit nasa mundo pa sila habang papunta ako sa iyo. Amang banal, ingatan mo sila sa iyong Pangalang ibinigay mo sa akin upang maging isa sila gaya natin.
"Nang kasama nila ako, iningatan ko sila sa iyong Pangalang ibinigay mo sa akin, at pinangalagaan ko sila at wala sa kanilang napahamak liban sa nagpahamak sa kanyang sarili upang maganap ang Kasulatan. At ngayon, papunta ako sa iyo at sinasabi ko ang mga ito habang nasa mundo upang maganap sa kanila ang aking kagalakan.
"Ibinigay ko sa kanila ang salita mo at napoot sa kanila ang mundo sapagkat hindi sila mula sa mundo gaya nang hindi ako mula sa mundo. Hindi ko ipinapakiusap na alisin mo sila sa mundo kundi pangalagaan mo sila sa masama.
"Hindi sila mula sa mundo gaya nang hindi ako mula sa mundo. Pabanalin mo sila sa katotohanan. Katotohanan ang salita mo. Kagaya nang ako'y sinugo mo sa mundo, sinugo ko rin sila sa mundo. At alang-alang sa kanila'y pinababanal ko ang aking salita upang pati sila'y pabanalin sa katotohanan."

Pagninilay-nilay
May palabas dati sa TV na "Alien" sa halip na "Amen" ang isinasagot sa mga salitang binibigkas ni Brod Pit. Alam natin na comedy lamang ito at kasintunog ng "Amen" ang "Alien" kaya iyon ang ginamit nila.
Sa pagsasabuhay ng ating pananampalataya, marami sa atin na "alien" o dayuhan sa mundong ito ang pagtingin sa kanilang sarili. Wala silang pakialam sa mundo dahil hindi naman sila tagarito kaya ang pagpunta nila sa langit ang kanilang pinagkakaabalahan. Ang Diyos ang may gawa ng mundo, at mabuti lahat ng kanyang ginawa. Wala tayong ibang daigdig kundi ang mundong nilikha at pinaglagyan sa atin ng Diyos.

balik calendario

Mayo 8
Huwebes

Ika-7 Linggo ng Pagkabuhay

Unang Pagbasa: Gawa 22:30; 23:6-11
Ebanghelyo: Jn 17:20-26

Sinabi ni Jesus: "Hindi lamang sila ang ipinapakiusap ko kundi pati ang mga nananalig sa akin sa pamamagitan ng kanilang salita. Maging iisa sana ang lahat kung paanong nasa akin ka, Ama, at ako'y nasa 'yo. Mapasaatin din sana sila upang maniwala ang mundo na ikaw ang nagsugo sa akin.
"Ibinigay ko naman sa kanila ang luwalhating ibinigay mo sa akin upang maging isa sila gaya nang tayo'y iisa: ako sa kanila at ikaw sa akin. Kaya magaganap sila sa kaisahan, at makikilala ng mundo na ikaw ang nagsugo sa akin, at minahal ko sila kung paanong minahal mo ako.
"Ama, sila ang ibinigay mo sa akin kaya niloloob kong kung nasaan ako'y makasama ko rin sila at mapansin nila ang bigay mo sa aking kaluwalhatian ko sapagkat minahal mo ako bago pa man nagkaroon ng mundo.
"Makatarungang Ama, hindi ka kilala ng mundo: kilala naman kita at kilala rin ng mga ito na ikaw ang nagsugo sa akin.
"Ipinagbigay-alam ko sa kanila ang Ngalan mo at ipinagbibigay-alam pa upang mapasakanila ang pagmamahal mo sa akin at ako ri'y mapasakanila."

Pagninilay-nilay
Paano maniniwala ang mundo kay Kristo kung tayong mga Kristiyano na tinatawag sa kanyang pangalan ay nananatiling watak-watak at kanya-kanya. Iisa lamang ang Kristo pero may kanya-kanyang grupo tayo. Nagpapagalingan, nagdedebatehan, at kung minsa'y nagsusuntukan pa kahit na nga sa mismong simbahan ng libingan ni Jesus sa Jerusalem!
Hindi pangangaral sa salita ang tunay na magpapakilala at magpapatotoo kay Jesus sa mga hindi pa naniniwala sa kanya. Sa buhay at gawa ng mga Kristiyano, makikilala si Kristo ng mundo. Pagkakaisa nating mga Kristiyano sa pagmamahalan ang pinakamabisang salita ng pamamahayag.

balik calendario

Mayo 9
Biyernes

Ika-7 Linggo ng Pagkabuhay

Unang Pagbasa: Gawa 25:13b-21
Ebanghelyo: Jn 21:15-19

Pagkapag-almusal nila, sinabi ni Jesus kay Simon Pedro: "Simon, anak ni Juan, mahal mo ba ako nang higit sa pagmamahal nila?" Sinabi nito sa kanya: "Oo, Panginoon, ikaw ang nakaaalam na iniibig kita." Sinabi sa kanya: "Pakanin mo ang aking mga kordero." Sinabi sa kanyang makalawa: "Simon, anak ni Juan, mahal mo ba ako?" Sinabi nito sa kanya: "Oo, Panginoon, ikaw ang nakaaalam na iniibig kita." Sinabi sa kanya: "Ipastol ang aking mga tupa." Sinabi sa kanyang makaitlo: "Simon, anak ni Juan, iniibig mo ba ako?"
Nalungkot na si Pedro dahil makaitlo siyang sinabihan: "Iniibig mo ba ako?" kaya si-nabi niya: "Panginoon, ikaw ang nakaaalam ng lahat; alam mong iniibig kita." Sinabi nito sa kanya: "Pakanin mo ang aking mga tupa.
Talagang-talagang sinasabi ko sa iyo, nang bata-bata ka pa, ikaw mismo ang nagbibigkis sa iyong sarili at palakad-lakad ka saan mo man naisin. Ngunit pagtanda mo'y ididipa mo naman ang mga kamay mo, at iba ang magbibigkis sa iyo sa hindi mo nais." Sinabi ito ni Jesus sa pagbibigay-tanda sa paraan ng kamatayang ipanluluwalhati ni Pedro sa Diyos. At pagkatapos nito ay sinabi niya: "Sumunod ka sa akin!"

Pagninilay-nilay
Matapos itatuwa ni Pedro si Jesus nang tatlong beses, tatlong beses ding tinatanong ngayon ni Jesus si Pedro kung mahal ba siya nito. Nalungkot si Pedro dahil kahit na sinagot niya ang tanong ni Jesus, muli pa rin siya nitong tinanong. Basahin mong muli ang pagbasa sa araw na ito at makikita na hindi talaga sinasagot ni Pedro kung talaga nga bang mahal niya si Jesus. "Iniibig kita" ang sagot ni Pedro sa tanong ni Jesus na "Mahal mo ba ako?" hanggang magkatugma ang tanong sa sagot.
Ano kaya ang talagang itinatanong sa atin ng Panginoon sa ating buhay? At ano naman ang sinasabi niyang gawin natin?

balik calendario

Mayo 10
Sabado

Ika-7 Linggo ng Pagkabuhay
Damien Joseph de Veuster ng Moloka'i

Unang Pagbasa: Gawa 28:16-20, 30-31
Ebanghelyo: Jn 21:20-25

Paglingon ni Pedro, nakita niyang sumusunod ang alagad na mahal ni Jesus, na siyang humilig sa tabi niya noong hapunan at nagsabing: "Panginoon, sino ba ang magkakanulo sa iyo?" Kaya pagkakita rito ni Pedro, sinabi niya kay Jesus: "Panginoon, ano naman sa kanya?" Sinabi sa kanya ni Jesus: "Kung loobin kong mamalagi siya hanggang ako'y pumarito, ano sa 'yo? Ikaw, sumunod ka sa akin!"
Dahil dito'y kumalat ang salitang ito sa mga kapatid na hindi mamamatay ang alagad na ito pero hindi naman sinabi sa kanya ni Jesus na hindi siya mamamatay kundi "Kung loobin kong mamalagi siya hanggang ako'y pumarito."
Ito ang alagad na siyang nagpapatunay tungkol sa mga bagay na ito at ang sumulat sa mga ito. At alam namin na totoo ang kanyang patunay. Marami pa ring ibang ginawa si Jesus, na kung isa-isang masusulat ang mga iyon, sa tantiya ko'y hindi magkakasya sa mundo ang isusulat na mga aklat.

Pagninilay-nilay
Dala-dala ng marami sa atin hanggang paglaki ang ugali natin noong mga bata pa tayo. Madali tayong mainggit sa kung anong meron ang ating kapwa na wala sa atin. Madalas din nating gawing dahilan ang iba sa paggawa ng mali sa pagsasabing "Eh bakit siya?"
Sa halip na tingnan natin kung ano ang meron ang iba, na wala sa atin, ituon natin ang ating paningin sa kung ano ang meron tayo. Grasya ng Diyos ang lahat, na dapat nating ipagpasalamat sa kanya. Sa halip na pagtakpan ang ating mga pagkukulang sa pagtukoy sa ating kapwa, aminin natin ang lahat at tanggapin ang awa at kagandahang-loob ng Diyos.

balik calendario

Mayo 11
Linggo

Linggo ng Pentekostes

Unang Pagbasa: Gawa 2:1-11

Nang sumapit ang Araw ng Pentekostes, magkakasama ang mga apostol sa iisang lugar. Biglang-biglang may narinig na malakas na ugong mula sa langit na parang malakas na hangin at pinuno niyon ang buong kabahayang kinaroroonan nila. May nakitang parang dilang-apoy na naghiwa-hiwalay at tumigil sa bawat isa. Napuspos silang lahat sa Espiritu Santo at nagsimulang magsalita sa ibang mga wika ayon sa ipinagkaloob ng Espiritu na salitain ng bawat isa.
Maraming relihiyosong Judio ang nasa Jerusalem noon, at galing pa sa iba't ibang bansa. Nang marinig nila ang ingay na iyon, nagkalipumpon sila at nagtaka dahil nakilala ng bawat isa ang sarili niyang wika sa mga sinasabi. Namangha sila at nagtaka, at kanilang sinabi:
"Di bakit mga Galileo ang lahat ng nagsasalita? Paano sila naririnig ng bawat isa sa atin sa mga katutubo nating wika? Dito'y may mga taga-Partia, mga taga-Media, mga taga-Elam, mga naninirahan sa Mesopotamia, Judea, Capadocia, Ponto at Asia. Ang iba sa ati'y galing pa sa Frigia, Panfilia at Ehipto, at sa mga rehiyon ng Libya na sakop ng Cirene; may mga bisitang galing sa Roma, mga Judio o kumbertido sa Judaismo; may mga taga-Creta at Arabia. Pero naririnig nating lahat sila sa kanya-kanyang wika natin na ipinahahayag ang mga dakilang gawa ng Diyos."

Slm 104:1, 24, 29-30, 31, 34
Ipadala ang iyong Espiritu, O Panginoon, at baguhin ang anyo ng lupa.

Ikalawang Pagbasa: 1 Cor 12:3-7, 12-13

Kaya ipinaaalam ko sa inyo na kung may nagsasalita sa bisa ng Espiritu ng Diyos, hindi niya masasabi: "Sumpain si Jesus." Gayundin walang makapagsasabi: "Panginoon si Jesus" maliban sa bisa ng Espiritu Santo.
Iba't iba ang mga kaloob ngunit iisa ang Espiritu. Iba't iba ang mga paglilingkod ngunit iisa ang Panginoon. Iba't iba ang mga gawain ngunit iisa ang Diyos na gumagawa ng lahat sa lahat.
Nagpapakita ang Espiritu sa pagbibigay sa bawat isa ng kaloob na pangkabutihan.
Tingnan ninyo: iisa ang katawan at marami ang sangkap nito. At iisang katawan lang ang mga sangkap kahit na marami ang mga ito. Gayon din si Kristo. Sa iisang Espiritu tayo bininyagang lahat-Judio man o Griyego, alipin man o malaya-upang buuin ng lahat ang isang katawan. At sa iisang Espiritu tayong lahat umiinom.

Ebanghelyo: Jn 20:19-23

Agaw-dilim na noon sa unang araw na iyon ng sanlinggo at nakasara ang mga pinto sa kinaroroonan ng mga alagad dahil sa takot sa mga Judio, dumating si Jesus at pumagitna. At sinabi niya sa kanila: "Kapayapaan sa inyo!"
Pagkasabi nito, ipinakita niya sa kanila ang mga kamay at ang tagiliran. Kaya nagalak ang mga alagad pagkakita nila sa Panginoon.
At muli niyang sinabi sa kanila: "Kapayapaan sa inyo! Kung paanong isinugo ako ng Ama, ipinadadala ko rin kayo." At pagkasabi nito, hiningahan niya sila at sinabi: "Tanggapin ang Espiritu Santo! Patatawarin ang mga kasalanan ninuman na inyong patawarin; at pananatiliin naman sa sinuman ang inyong panatiliin."

Pagninilay-nilay
Espiritu. Salitang-hiram ang "espiritu" at may dalawang karaniwang kahulugan ito sa ating wika: ang espiritung kaiba sa katawan at ang espiritu ng alak.
Alam natin kung gaano kalakas ang espiritu ng alak, kahit na nga hindi tayo umiinom. Nagkakaroon ng lakas ang nasa ilalim ng espiritu ng alak para gawin ang karaniwa'y hindi niya magagawa. Bukod dito, nagpapaligaya rin ang espiritu ng alak. Tingnan mo at pakinggan ang pagsasaya ng mga lasing!
Lakas din at tuwa ang hatid ng Espiritu ng Diyos, na higit pa sa espiritu ng alak, at ipinagkaloob sa atin ang Espiritung ito. Kailangan lamang na malasing tayo nito.

balik calendario

Mayo 12
Lunes

Ika-6 na Linggo ng Taon
Nereus at Achilles / Pancrasio

Unang Pagbasa: Jaime 1:1-11
Ebanghelyo: Mc 8:11-13

Dumating ang mga Pariseo at nagsimulang makipagtalo sa kanya. Gusto nilang subukan si Jesus at humingi ng makalangit na tanda. Nagbuntung-hininga siya at sinabi: "Bakit humihingi ng palatandaan ang lahing ito? Talagang sinasabi ko sa inyo: walang tandang ibibigay sa lahing ito." Kaya iniwan sila ni Jesus at sumakay sa bangka patawid sa kabilang ibayo.

Pagninilay-nilay
Humihingi ng tanda sa Diyos si Juliet bago ito maniwala sa kanya. Naghahanap siya ng himala na magpapatunay na meron ngang Diyos. Ngunit para sa mga hindi naniniwala, walang anumang himala sa mundo. Bulag ang kanilang mga mata sa himala ng buhay-na mula sa maliit ng binhi ay isinisilang ang isang bagong nilalang, isang sanggol ang ipinapanganak ng kanyang ina, isang malaking puno ang umuusbong mula sa maliit na buto. Para sa mga hindi naniniwala, hindi nila makikita ang mga kahanga-hangang talutot ng mga bulaklak-pare-pereho ngunit magkakaiba rin. Sayang at kung ano pang himala ang hinahanap nila gayong buhay nila mismo'y isang dakilang himala.

balik calendario

Mayo 13
Martes

Ika-6 na Linggo ng Taon
Birhen ng Fatima

Unang Pagbasa: Jaime 1:12-18
Ebanghelyo: Mc 8:14-21

Nakalimutan nilang magdala ng tinapay at isa lang ang dala nila sa bangka. At pinagsabihan sila ni Jesus: "Mag-ingat at huwag magtiwala sa lebadura ng mga Pariseo at sa lebadura ni Herodes." At sinabi ng mga alagad sa isa't isa: "Oo nga, ano? Wala tayong dalang tinapay."
Alam ni Jesus ang mga ito kaya sinabi niya sa kanila: "Bakit ninyo pinag-uusapan ang tinapay na wala sa inyo? Hindi pa ba ninyo maisip at maunawaan? Mapurol ba ang inyong pag-iisip? May mata kayong di nakakakita at may taingang di nakakarinig? Hindi na ba ninyo naaalala nang pinira-piraso ko ang limang tinapay para sa limang libo, ilang basket na puno ng mga pira-piraso ang inyong naipon?" At sumagot sila: "Labindalawa." At nang may pitong tinapay para sa apat na libo, ilang bayong na puno ng mga pira-piraso ang inyong naipon?" At sumagot sila: "Pito." At sinabi ni Jesus: "Hindi pa ba ninyo nauunawaan?"

Pagninilay-nilay
Taun-taon nagpuprusisyon ang mga tao sa Macau mula sa katedral hanggang sa simbahan ng Birhen ng Fatima sa tuktok ng burol. Mga tatlong oras ding naglalakad ang mga tao sa sentro ng siyudad patungo sa simbahan sa Penha at may loudspeaker sa kahabaan ng kalyeng dinaraanan ng prusisyon kaya dinig ng lahat ang pagdarasal ng rosaryo. Pagsapit sa simbahan sa burol, dinarasal ng lahat ang pag-aalay ng mundo at ng siyudad sa Mahal na Birhen, at pagkatapos ay ginagawa ang benediksyon-ang pagbabasbas sa mundo at sa siyudad ng Macau.
Patuloy ang pagdiriwang na ito taun-taon kahit na nga bahagi na uli ng China ang Macau.

Mayo 14
Miyerkules

Ika-6 na Linggo ng Taon
Matias, Apostol

Unang Pagbasa: Gawa 1:15-17, 20-26
Ebanghelyo: Jn 15:9-17

Sinabi ni Jesus sa kanyang mga alagad, "Kung paano ako minamahal ng Ama, gayon ko rin kayo minahal. Mamalagi kayo sa pagmamahal ko. Kung isasakatuparan ninyo ang mga kautusan ko, mamamalagi kayo sa pagmamahal ko kung paanong isina-katuparan ko ang mga kautusan ng aking Ama at namamalagi sa kanyang pagmamahal.
"Sinabi ko sa inyo ang mga ito upang mapasainyo ang aking kagalakan at maging ganap ang inyong kagalakan. Ito ang kautusan ko: magmahalan kayo kung paano ko kayo minahal. Wala nang pagmamahal na hihigit pa sa pag-aalay ng sariling buhay alang-alang sa kanyang mga kaibigan.
"Mga kaibigan ko kayo kung ginagawa ninyo ang iniuutos ko sa inyo. Hindi ko na kayo tinatawag na mga lingkod sapagkat hindi alam ng lingkod ang ginagawa ng kanyang panginoon.
"Mga kaibigan naman ang turing ko sa inyo sapagkat ipinagbibigay-alam ko sa inyo lahat ng narinig ko mula sa aking Ama.
"Hindi kayo ang humirang sa akin, ako ang humirang sa inyo at nagtalaga sa inyo para humayo at mamunga, at mamalagi ang inyong bunga. At ipagkakaloob sa inyo anumang hingin n'yo sa Ama sa pangalan ko.
"Iniuutos ko nga sa inyo: magmahalan kayo."

Pagninilay-nilay
Tunay na kahanga-hanga ang ating mga ina. Sila ang nagsilang, nag-aruga at nagpalaki sa atin. Bukod sa pag-aasikaso nila sa ating bahay at sa atin na kanilang mga anak, naghahanapbuhay pa rin ang marami sa kanila, lalo na nga kung mga OFW sila!
Hindi lamang panahon kundi maging pera ang wala sila para sa kanilang sarili. Totoong ibinibigay nila sa atin kahit na ang dapat sana'y isusubo nila para sa kanilang sarili. At parang hindi pa sapat ang lahat ng ito dahil sa kanilang pagtanda at kahit mahina na sila, mga apo naman ang aalagaan nila't palalakihin. Ang lahat ng ito at iba pa hanggang sa sila'y mawalay sa atin…

balik calendario

Mayo 15
Huwebes

Ika-6 na Linggo ng Taon
Isidro Labrador

Unang Pagbasa: Jaime 2:1-9
Ebanghelyo: Mc 8:27-33

At pumunta si Jesus kasama ang kanyang mga alagad sa mga nayon ng Cesarea ni Fi-lipo. At habang nasa daa'y tinanong niya ang kanyang mga alagad: "Sino raw ako ayon sa mga tao?" Sumagot sila: "May nagsasabing si Juan Bautista ka; may iba pang nagsasabing si Elias ka o isa sa mga propeta kaya."
At tinanong niya sila: "Ngunit ano naman ang sinasabi ninyo kung sino ako?" At sumagot si Pedro: "Ikaw ang Mesiyas." At inutusan niya sila na huwag sabihin kaninuman ang tungkol sa kanya.
At sinimulan niyang ituro sa kanila na kailangang magtiis ng marami ang Anak ng Tao. Itatakwil nga siya ng mga Matatanda ng bayan, ng mga punong-pari at ng mga guro ng Batas. Papatayin siya at muling babangon pagkatapos ng tatlong araw. At buong-tapang siyang nagsalita. Dinala naman siya ni Pedro sa isang tabi at sinimulan siyang pagsabihan. Ngunit pagtalikod ni Jesus, nakita niya na naroon din ang kanyang mga alagad. Kaya pinagsabihan niya si Pedro: "Sa likod ko, Satanas! Hindi sa Diyos galing ang iniisip mo kundi mula sa tao."

Pagninilay-nilay
Nagsimula ang Pahiyas bilang pasasalamat ng mga magsasaka sa Diyos para sa bunga at kasaganaan ng lupa kaya isinasabit nila ang kanilang mga ani. Sa kanilang pagdiriwang, isinisimbolo ng kanilang mga gulay at mga produkto ng ani ang kanilang sarili dahil bahagi mismo iyon ng kanilang buhay at kabuhayan. Kaya nagiging makahulugan ang Pahiyas ng mga magsasaka.
Ang ugat at diwa ng anumang pagdiriwang ang dapat nating madiskubre. Hindi Xerox ang tunay na pagsasadiyos. Anong kahulugan meron ang pagsasabit ng mga gulay na galing sa supermarket? Ano kayang selebrasyon ang babagay sa klase ng buhay natin sa kasalukuyan?

Mayo 16
Biyernes

Ika-6 na Linggo ng Taon

Unang Pagbasa: Jaime 2:14-24
Ebanghelyo: Mc 8:34-9:1

At tinawag ni Jesus ang kanyang mga alagad pati ang mga tao, at sinabi: "Kung may gustong sumunod sa akin, itakwil ang kanyang sarili at kunin ang kanyang krus para sumunod sa akin. Sapagkat ang naghahangad na magligtas ng kanyang sarili ay mawawalan nito, at ang mawawalan ng sarili alang-alang sa akin at sa ebanghelyo ang magliligtas nito.
"Ano ang pakinabang ng tao tubuin man niya ang buong daigdig kung sarili naman niya ang mawala? At pagkatapos ay ano ang maibibigay niya para mabawi ang kanyang sarili? Ang ikinahihiya ako at ang aking mga salita sa harap ng di-tapat at makasalanang lahing ito ay ikahihiya rin ng Anak ng Tao pagdating niyang taglay ang luwalhati ng kanyang Ama, kasama ng mga banal na anghel."
At idinagdag ni Jesus: "Totoong sinasabi ko sa inyo na di daranas ng kamatayan ang ilan sa mga naririto hanggang hindi nila nakikita ang kaharian ng Diyos na dumarating na may kapangyarihan."

Pagninilay-nilay
Madaling sabihin na ipamimigay natin sa mga pobre ang ating mga pera kapag yumaman tayo dahil sa totoo'y wala naman tayong pera. May kung anong hiwaga ang pera kayat kumakapit ito sa ating mga kamay sa sandaling mahawakan natin ito. Sa pagkakaroon natin ng pera, lalo lamang tumitindi ang paghahangad natin na magkaroon ng mas marami pang pera. Aanhin ba natin ang pera? May mga taong pera lamang ang pinag-aaksayahan nila ng panahon. Habambuhay silang nagtatrabaho para kumita at mag-ipon ng limpak-limpak. Ngunit pagsapit ng huling sandali ng buhay, walang anumang magagawa ang perang meron sila; ni hindi nila madadala sa hukay kahit isang kusing man.

Mayo 17
Sabado

Ika-6 na Linggo ng Taon

Unang Pagbasa: Jaime 3:1-10
Ebanghelyo: Mc 9:2-13

Pagkaraan ng anim na araw, isinama ni Jesus sina Pedro, Jaime at Juan, at umakyat na sila lamang ang kasama sa mataas na bundok. At nagbago ang anyo ni Jesus sa harap nila at kuminang na puting-puti ang kanyang damit, na walang makapaglalabang simputi niyon sa lupa. At napakita sa kanila sina Elias at Moises na nakikipag-usap kay Jesus.
Kaya nagsalita si Pedro at kanyang sinabi: "Panginoon, mabuti at narito tayo. Gagawa kami ng tatlong kubol: isa para sa iyo, isa para kay Moises, at isa para kay Elias." Nasindak sila kaya hindi niya malaman kung ano ang sasabihin.
At may ulap na lumilim sa kanila. At narinig mula sa ulap ang salitang ito: "Ito ang aking Anak, ang Minamahal, pakinggan ninyo siya." At biglang-bigla, pagtingala nila, wala silang nakita liban kay Jesus na kasama nila.
At pagbaba nila mula sa bundok, inutusan niya sila na huwag sabihin kaninuman ang nakita nila hanggang makabangon ang Anak ng Tao mula sa mga patay.

Pagninilay-nilay
Kanino ka mas may debosyon: sa Santo Niño, sa Lord of Pardon, sa Nazareno, o sa Santo Entierro?
May paboritong debosyon ang bawat isa sa atin. Pero kung titingnan nating mabuti-iisang Jesus lamang ang tinutukoy ng lahat ng iyon. Gusto ng ilan sa atin ang Jesus na bata samantalang ang Jesus na mapagpatawad o nagpakasakit o namatay para sa atin ang mas gusto ng iba.
Ngunit sino bang talaga ang Jesus na nasa Ebanghelyo? Ayon ba sa salaysay ng Ebanghelyo na Propetang nagpahayag ng malasakit at katarungan ang pagkakakilala natin kay Jesus? Magbagong-anyo sana si Jesus sa atin ngayon.

Mayo 18
Linggo

Tatlong Persona sa Iisang Diyos

Unang Pagbasa: Ex 34:4b-6,8-9

Kaya suminsil si Moises ng dalawang tapyas na bato tulad ng una. At maaga siyang gumising kinabukasan at umahon sa Bundok Sinai tulad ng iniutos ni Yawe, hawak sa kanyang mga kamay ang dalawang tapyas na bato.
At bumaba si Yawe na nasa ulap, at tumayo roong kasama niya, at ipinahayag ang kanyang pangala-Yawe.
Dumaan si Yawe sa kanyang harap at sumigaw: "Si Yawe, si Yawe ang Diyos na maawain at mapagpatawad, banayad sa pagkagalit at sagana sa kabutihang-loob at katapatan.
Nagmamadaling yumuko si Moises sa lupa at sumamba. At sinabi niya: "O Panginoon, kung kalugud-lugod nga ako sa iyong paningin, halika't lumakad kasama namin. At kahit na matigas ang ulo ng bayang ito, patawarin mo sana ang aming mga kasamaan at pagkakasala, at angkinin kami."

Dn 3:52, 53, 54, 55
Purihin at ipagdangal ang Diyos magpakailanman.

Ikalawang Pagbasa: 2 Cor 13:11-13

Sa wakas, mga kapatid, magalak kayo. Sikapin ninyong maging ganap, at mag-aliw-aliw kayo. Magkaisa sana kayo sa iisang diwa at mamuhay na mapayapa, at sasainyo ang Diyos ng pag-ibig at kapayapaan. Magbatian kayo ng banal na halik. Binabati kayo ng lahat ng banal.
Sumainyo ang kagandahang-loob ng Panginoong Jesucristo, ang pag-ibig ng Diyos at ang pakikisama ng Espiritu Santo.

Ebanghelyo: Jn 3:16-18

Sinabi ni Jesus: "Ganito nga kamahal ng Diyos ang mundo! Kayat ibinigay niya ang kanyang bugtong na anak upang hindi na mawala ang bawat nananalig sa kanya kundi magkaroon ng buhay magpakailanman.
"Hindi nga sinugo ng Diyos sa mundo ang Anak upang hukuman ang mundo kundi upang maligtas ang mundo sa pamamagitan niya. Hindi hinuhukuman ang nananalig sa kanya. Ngunit hinukuman na ang hindi nananalig pagkat hindi siya nananalig sa Ngalan ng bugtong na Anak ng Diyos."

Pagninilay-nilay
Isa. Karaniwang salita ang "isa" pero ito ang simula ng walang hanggang bilang. Taglay ng "isa" ang kabuuan dahil kahit na walang "dalawa," maaari pa ring magkaroon ng "isa," ngunit walang "dalawa," o "tatlo," o ilan pa man kung walang "isa."
Sa kasaysayan ng sangkatauhan, marami ang nagbuwis ng buhay para ipahayag nila na isa ang Diyos! Ito rin ang pahayag sa atin ng Biblia. Sa pagdating ni Jesus, itinuro niya na Isang Diyos ang Amang nagmamahal sa atin, ang Anak na nagmamagandang-loob at ang Espiritung nagbubuklod sa lahat. Ama, Anak at Espiritu Santo sa Iisang Diyos-ang dakilang aral ng pagkakaisa para sa ating lahat.

Mayo 19
Lunes

Ika-7 Linggo ng Taon

Unang Pagbasa: Jaime 3:13-18
Ebanghelyo: Mc 9:14-29

Pagbalik nila sa mga alagad, nakita nila ang napakaraming tao na nakapalibot sa mga ito at nakikipagtalo naman sa kanila ang mga guro ng Batas. Namangha ang lahat pagkakita sa kanila, at tumakbo sila para batiin siya.
Itinanong naman niya sa kanila: "Bakit kayo nakikipagtalo sa mga ito?" At sinagot siya ng isang lalaki mula sa mga tao: "Guro, dinala ko sa iyo ang aking anak na lalaki na inaalihan ng isang piping espiritu. At kung hinahagip siya nito, inilulugmok siya sa lupa; nagbubula ang kanyang bibig, nagngangalit ang mga ngipin at naninigas. Hiningi ko sa iyong mga alagad na palayasin ito pero hindi nila kaya."
Sumagot si Jesus: "Mga walang pananampalataya! Gaano pa katagal akong mananatili sa piling ninyo? Hanggang kailan ako magtitiis sa inyo? Dalhin siya rito sa akin."
At pinalapit nila siya kay Jesus. Pagkakita sa kanya ng espiritu, pinangatog nito ang bata at inilugmok sa lupa kaya nagpagulung-gulong siya at bumubula ang bibig. Tinanong naman ni Jesus ang ama: "Gaano na katagal na nangyayari ito sa kanya?" At sumagot ang ama: "Mula pa sa pagkabata at madalas nga siyang inihahagis sa apoy o sa batis para patayin. Ngunit kung kaya mo, maawa ka sa amin at pakitulungan kami."
Sinagot siya ni Jesus: "Ano itong 'kung kaya mo'? Lahat ay posible sa sumasampalataya." At agad na sumigaw ang ama ng bata sa pagsasabing "Sumasampalataya ako pero tulungan mo ang maliit kong pananampalataya."
Nakita ni Jesus na nagsisitakbo at lumalapit na ang mga tao kaya iniutos niya sa masamang espiritu: "Pipi at binging espiritu, inuutusan kitang lumabas sa kanya at huwag nang bumalik."
Nagsisigaw ang espiritu at inilugmok ang bata sa lupa bago lumabas. At animo'y patay ang bata kaya marami ang nagsabing "Namatay." Ngunit pagkahawak ni Jesus sa kamay nito, pinabangon niya ito at pinatindig.
Pagkapasok ni Jesus sa bahay, tinanong siya ng mga alagad nang sarilinan: "Bakit hindi namin napalayas ang espiritu?" Sinabi ni Jesus sa kanila: "Sa panalangin lamang mapalalayas ang ganitong klaseng espiritu."

Pagninilay-nilay
Madaling sabihin na naniniwala tayo sa Diyos pero kung talagang susuriin natin ang ating mga sarili, makikita na kulang pa rin ang ating pananalig sa kanya. Hindi pa rin nating magawang "angkinin" ang mga bagay na ating ipinagdarasal; kahit na nga hinihiling pa lang natin sa Diyos eh hindi natin magawang ituring atin ang mga ipinagkaloob sa atin ng Panginoon.
Alalahanin na regalo ng Diyos maging ang ating pananampalataya. Sa atin niya ipinagkaloob ang biyayang ito at hindi sa iba, at tinanggap naman natin ito sa ating buhay. Ngunit kailangan din natin itong pagyamanin at kailangan din nating hingin sa kanya na palakihin ang maliit nating pananampalataya.

balik calendario

Mayo 20
Martes

Ika-7 Linggo ng Taon
Bernardino ng Siena

Unang Pagbasa: Jaime 4:1-10
Ebanghelyo: Mc 9:30-37

Umalis si Jesus at ang kanyang mga alagad at nagsimulang dumaan sa Galilea. Gusto niya na walang sinumang makaalam dahil tinuturuan niya ang kanyang mga alagad.
At sinabi niya sa kanila: "Ibibigay ang Anak ng Tao sa kamay ng mga tao. Papatayin nila siya ngunit pagkapatay nila sa kanya, babangon siya sa ikatlong araw."
Kaya lubha silang nalungkot. Hindi nila ito naintindihan at hindi rin sila nangahas magtanong sa kanya.
Pagdating nila sa Capernaum, nang nasa bahay na siya, tinanong niya sila: "Ano ang pinag-uusapan ninyo sa daan?" At hindi sila umimik; pinagtatalunan nga nila sa daan kung sino ang mas una.
Kaya naupo siya at pagkatawag sa Labindalawa ay sinabi sa kanila: "Kung may gustong mauna, maging huli siya sa lahat at lingkod ng lahat."
At pagkakuha niya sa isang maliit na bata, pinatayo ito sa gitna nila at inakbayan at saka sinabi sa kanila: "Ang sinumang tumanggap sa isa sa mga batang ito nang dahil sa aking pangalan ay tumatanggap sa akin. At ang tumatanggap sa akin ay hindi ako ang tinatanggap kundi ang nagsugo sa akin."

Pagninilay-nilay
Dating matalik na magkaibigan sina Bro. Joe at Bro. Pete. Magkababata at magkaklase pa hanggang kolehiyo. At ngayon nga'y magkapitbahay pa sila. "Kambal" pa nga kung minsan ang tukso sa kanilang dalawa dahil lagi silang magkasama at ang kanilang mga asa-asawa saanman sila pumunta.
Magkasama rin sila sa samahan sa kanilang parokya pero ang pagkakasama nila sa samahang iyon ang naging dahilan para magkasamaan ng loob at maghiwalay ang "Kambal." Pareho nilang gustong maging pangulo ng kanilang samahan kayat nang si Bro. Jose ang mahalal, nagsimula nang lumayo si Bro. Pete hindi lamang mula sa kanya kundi pati na sa kanilang samahan.

balik calendario

Mayo 21
Miyerkules

Ika-7 Linggo ng Taon
Christopher Magallanes

Unang Pagbasa: Jaime 4:13-17
Ebanghelyo: Mc 9:38-40

Sinabi naman ni Juan kay Jesus: "Guro, may nakita kaming di natin kasama na nagpapalayas ng mga demonyo sa bisa ng iyong pangalan. Ngunit pinigil namin siya dahil hindi natin siya kasama." At sinabi ni Jesus: "Huwag ninyo siyang pigilan. Wala ngang gumagawa ng himala sa bisa ng aking pangalan na agad na magsasalita laban sa akin. Ang hindi laban sa atin ay kampi sa atin."

Pagninilay-nilay
Lumaking walang relihiyon si Martin at nagpasya siyang maging Katoliko noong 17 taong gulang siya. Ngunit hindi nagtagal at sa kung anong fellowship siya nagsimulang dumalo kaysa magsimba tuwing Linggo. Hindi madama sa misa natin sa simbahan ang pagiging komunidad ng mga nagsisimba; para bang pumapasok lamang tayo sa sinehan, na walang pakialam sa isa't isa at pagkatapos ay kanya-kanya rin tayo ng uwi. Ibang-iba naman ito sa fellowship na kanyang pinupuntahan dahil sa simula pa lang, winiwelcome ng lahat ang sinuman. Madarama mong tanggap ka at talagang may pagkakaisa ang lahat. Ni hindi natin binabati ang ating katabi sa simbahan pero magkakakilala silang lahat sa fellowship.

balik calendario

Mayo 22
Huwebes

Ika-7 Linggo ng Taon
Rita ng Casia

Unang Pagbasa: Jaime 5:1-6
Ebanghelyo: Mc 9:41-50

Sinabi ni Jesus sa kanyang mga alagad: "At kung may magpainom sa inyo ng malamig na tubig alang-alang sa aking pangalan dahil kay Kristo kayo, talagang sinasabi ko sa inyo na hindi siya mananatiling walang gantimpala.
"Ngunit kung may tumisod at magpadapa sa isa sa maliliit na ito na nananalig, mas makabubuti pa para sa kanya na itapon siya sa dagat na may taling malaking bato sa kanyang leeg.
"Kung ang kamay mo ang nagtutulak sa iyo sa kasalanan, putulin mo ito. Mas mabuti pa sa iyo ang pumasok na pingkaw sa buhay kaysa matapon sa walang hanggang apoy ng impiyerno na may dalawang kamay. At kung ang paa mo ang nagtutulak sa iyo sa kasalanan, putulin mo ito. Mas mabuti pa sa iyo ang pumasok na pilay sa buhay kaysa matapon sa impiyerno na may dalawang paa.
"At kung ang mata mo ang nagtutulak sa iyo sa kasalanan, itapon mo ito. Mabuti pa sa iyo ang pumasok sa kaharian ng Diyos na may isang mata kaysa matapon sa impiyerno na may dalawang mata, kung saan walang tigil ang mga uod sa kanila at walang kamatayan ang apoy. Buburuhin nga ng apoy ang lahat.
"Mabuti ang asin ngunit kung tumabang ang asin, paano ninyo ito mapaaalat uli? Magkaroon kayo ng asin sa inyong sarili at mabuhay sa kapayapaan sa isa't isa."

Pagninilay-nilay
Sa istorya ng Munting Prinsipe, sinasabi niyang maraming binhi ng baobab sa kanyang planeta. Malaking puno, tulad ng akasya, ang baobab pero nagsisimula ito bilang maliit na binhi. Sumisibol, tumutubo at lumalaki. At pagkalipas ng mahabang panahon, nagiging malaking puno ang dating maliit na binhi.
At sabi ng Munting Prinsipe, kailangang bunutin niya kaagad ang mga binhi ng baobab habang maliit pa ang mga ito dahil sa liit ng kanyang planeta, tiyak na magsisikip iyon paglaki ng mga baobab, bukod sa mahirap nang bunutin ang baobab kapag malaki na ito.
Ganito rin ang dapat nating gawin sa anumang bisyo o kasalanan.

balik calendario

Mayo 23
Biyernes

Ika-7 Linggo ng Taon

Unang Pagbasa: Jaime 5:9-12
Ebanghelyo: Mc 10:1-12

Nagpunta si Jesus sa probinsya ng Judea, sa kabilang ibayo ng Ilog Jordan. At napakaraming tao na naman ang nagdatingan. At muli niya silang tinuruan gaya nang dati. At lumapit ang ilang Pariseo na gusto siyang subukan at tinanong nila siya: "Pinahihintulutan bang diborsiyuhin ng lalaki ang kanyang asawa sa anumang dahilan?" Itinanong naman niya: "Ano ang iniutos sa inyo ni Moises?" At sinabi nila: "Ipinahintulot ni Moises na paalisin ang babae pagkabigay sa kanya ng kasulatan ng diborsiyo."
Sinabi naman ni Jesus sa kanila: "Alam ni Moises na matigas ang inyong puso kaya sinulat niya ang kautusang ito. Ngunit sa simula'y ginawa sila ng Maykapal na lalaki at babae, at dahil dito, iiwan ng lalaki ang kanyang ama at ina at magiging iisang katawan ang dalawa. Kung gayo'y hindi na sila dalawa kundi iisang katawan lamang kaya huwag paghiwalayin ng tao ang pinagbuklod ng Diyos."
Nang nasa bahay na sila, tinanong siyang muli ng mga alagad. At sinabi niya sa kanila: "Kung may lalaking magpaalis sa kanyang asawa at saka magpakasal sa iba, nakiapid na siya. At kung ang babae naman ang magpaalis sa lalaki at magpakasal sa iba, nakikiapid din siya."

Pagninilay-nilay
Hindi kaning isusubo ang pag-aasawa, na puwedeng iluwa sa sandaling mapaso ka-ganito ang sabi ng ating mga lolo at lola. Marami ang mga naghihiwalay dahil hindi malinaw sa kanila kung ano bang talaga ang buhay-may-asawa na kanilang pinasok.
Bukod sa pagmamahalan ng isang babae at isang lalaki, inaako rin ng bawat isa na paninindigan nila ang pagmamahal na iyon. Hindi lamang damdamin ang pagmamahal kundi komitment ito at pagtatalaga ng sarili sa kabiyak, kahit na nga "mapaso" pa sila sa kanilang pagsasama. At mga taong mature lamang ang talagang makagagawa ng ganitong commitment.

balik calendario

Mayo 24
Sabado

Ika-7 Linggo ng Taon

Unang Pagbasa: Jaime 5:13-20
Ebanghelyo: Mc 10:13-16

May nagdala naman kay Jesus ng mga bata para hipuin niya sila. Ngunit pinagalitan ng mga alagad ang mga taong may dala sa kanila.
At pagkakita ni Jesus, nagalit siya at sinabi sa kanila: "Pabayaan ninyong lumapit sa akin ang mga bata. Huwag ninyo silang pigilan. Sa mga tulad nga nila ang kaharian ng Diyos. Talagang sinasabi ko sa inyo: hindi papasok sa kaharian ng Diyos ang di tumatanggap dito gaya ng maliit na bata." At pagkakalong sa kanila ni Jesus, ipinatong niya sa kanila ang kanyang mga kamay para basbasan sila.

Pagninilay-nilay
Mga sampung taong gulang noon si Luis. Pinagalitan siya at pinalo ng kanyang ama kaya lumayas siya at napadpad sa Lucena City. Doon niya nakilala ang mga batang-kalye. At para may makain, nagbabantay sila kung minsan ng mga kotse, o nagpapalimos kaya. Doon din natuto si Luis lumanghap ng Rugby para hindi niya maramdaman ang lungkot at gutom at pagsisisi.
Habang nasa lansangan sa Lucena si Luis, wala rin namang tigil ang kanyang ina sa paghanap sa kanya sa mga kalye sa kanilang bayan sa Mataas-na-Kahoy sa Batangas. Hindi lamang si Luis ang nagsisisi kundi maging ang kanyang ama, na naghahanap din sa kanya.

balik calendario

Mayo 25
Linggo

Katawan at Dugo ni Kristo

Unang Pagbasa: Dt 8:2-3,14b-16a

Sinabi ni Moises sa mga tao, "Alalahanin mo ang lahat ng daang pinagdalhan sa iyo sa disyerto ni Yaweng Diyos mo sa loob ng apatnapung taong ito. Pinapaghirap ka niya at ginutom upang subukan ka at malaman ang nasa iyong puso, kung tutuparin mo nga ang kanyang mga utos o hindi. Subalit pinakain ka niya ng manna na hindi mo alam ni ng iyong mga ninuno upang ipakita sa iyo na hindi lamang sa tinapay nabubuhay ang tao, kundi sa lahat ng namumutawi sa bibig ni Yawe mabubuhay ang tao.
"Huwag maging palalo ang iyong puso at huwag limutin si Yaweng iyong Diyos na naglabas sa iyo mula sa lupain ng Ehipto, mula sa bahay ng pagkaalipin. Siya ang umakay sa iyo para makalampas sa malawak at nakatatakot na disyertong puno ng mga "apuy-apuyang" ahas at mga alakdan, lupaing tigang at walang tubig. Subalit pinabukal niya ang tubig para sa iyo mula sa napakatigas na bato. At pinakain ka niya sa disyerto ng mannang hindi alam ng iyong mga ninuno.
"Pinapaghirap ka niya at sinubok upang mapabuti ka sa bandang huli."

Slm 147:12-13, 14-15, 19-20
Purihin mo ang Panginoon, O Jerusalem.

Ikalawang Pagbasa: 1 Cor 10:16-17

Mga kapatid, "Ang kopa ng pagpapala na ating pinagpapala, hindi ba ito ang pakikiba-hagi sa dugo ni Kristo? Ang tinapay na ating pinaghahati-hati, hindi ba ito ang paki-kibahagi sa katawan ni Kristo? Dahil iisa ang tinapay, nagiging iisang katawan tayong lahat sa pakikibahagi natin sa iisang tinapay."

Ebanghelyo: Jn 6:51-58

Sinabi ni Jesus sa mga tao: "Ako siyang tinapay na buhay, na pumanaog mula sa Langit. Kung may kakain ng tinapay na ito, mabubuhay siya magpakailanman. At ang laman ko ang tinapay na aking ibibigay alang-alang sa ikabubuhay ng mundo."
Kaya nagtalu-talo ang mga Judio at nagsalita: "Paano tayo mabibigyan ng taong ito ng laman para kainin?" Sinabi naman ni Jesus sa kanila: "Talagang-talagang sinasabi ko sa inyo, kung hindi n'yo kakanin ang laman ng Anak ng Tao at iinumin ang kanyang dugo, wala kayong buhay sa inyong sarili. May buhay magpakailanman ang ngumunguya ng aking laman at umiinom ng aking dugo, at itatayo ko siya sa huling araw.
"Sapagkat totoong pagkain ang aking laman at totoong inumin ang aking dugo. Ang ngumunguya ng aking laman at umiinom ng aking dugo ay namamalagi sa akin at ako naman sa kanya. Sinugo nga ako ng Amang buhay at buhay ako dahil sa Ama, gayundin naman dahil sa akin mabubuhay ang ngumunguya sa akin.
"Ito ang tinapay na pumanaog mula sa Langit, hindi gaya sa inyong mga ninuno na kumain at nangamatay pa rin. Mabubuhay naman magpakailanman ang ngumunguya ng tinapay na ito."

Pagninilay-nilay
Katawan. May katawan ang bawat isa; ito mismo ang katawan mo mula nang ipanganak ka. Pero sa ating paglaki, lumaki rin ang ating katawan at ang mga bahagi nito.
Malimit nating marinig na tayo rin ang Katawan ni Kristo; tayo ang bumubuo sa iba't ibang bahagi ng kanyang Katawan. Ngunit parang hanggang sa salita lamang ito.
Sa pagkokomunyon natin sa misa, nakikibahagi tayo sa tinapay na katawan ni Kristo hindi bilang debosyon kundi tanda ng pag-ako natin na tayo ang magiging buháy na Katawan ni Kristo.

balik calendario

Mayo 26
Lunes

Ika-8 Linggo ng Taon
Felipe Neri

Unang Pagbasa: 1 P 1:3-9
Ebanghelyo: Mc 10:17-27

At nang palakad na siya, may taong patakbong sumalubong sa kanya at paluhod na nagtanong: "Mabuting guro, ano ang dapat kong gawin para magmana ng buhay na walang hanggan?"
Sumagot sa kanya si Jesus: "Bakit mo ako tinatawag na mabuti? Walang mabuti kundi ang Diyos lamang. Alam mo ang mga utos: Huwag papatay, huwag makiapid, huwag magnakaw, huwag manirang-puri sa kapwa, huwag mandaya, igalang ang iyong ama at ina." Sinabi sa kanya ng tao: "Sinunod ko ang lahat ng ito mula pagkabata, ano pa ang kulang ko?" Kaya tinitigan siya ni Jesus at minahal siya, at sinabi: "Isa ang kulang sa iyo. Umuwi ka at ipagbili ang lahat ng iyo at ibigay sa mga dukha, at magkakaroon ka ng kayamanan sa Langit. At saka ka bumalik para sumunod sa akin."
Pinanghinaan ng loob ang tao sa salitang ito at umalis na malungkot sapagkat napakayaman niya.
Kaya tumingin si Jesus sa paligid at sinabi sa kanyang mga alagad: "Napakahirap ngang makapasok ang mga may kayamanan sa kaharian ng Diyos." Takang-taka nga ang mga alagad dahil sa pananalitang ito. Kaya muling sinabi ni Jesus sa kanila: "Mga anak, napakahirap pumasok sa kaharian ng Diyos! Oo, mas madali pa para sa kamelyo ang lumusot sa butas ng karayom kaysa pumasok ang isang mayaman sa kaharian ng Diyos."
Lalo pang namangha ang mga alagad at nag-usap-usap: "Kung gayon, sino ang maliligtas?" Tinitigan sila ni Jesus at sinabi: "Imposible ito para sa tao pero hindi para sa Diyos; lahat ay posible para sa Diyos."

Pagninilay-nilay
Ang mga salitang ito ni Jesus ang nakatawag-pansin kay Francisco ng Assisi kaya sinimulan niyang ipamigay ang mga telang tinda ng kanyang ama, pati na ang perang bigay nito sa kanya. Nauwi sa pagtatakwil sa kanya ng kanyang ama ang pamimigay niyang iyon sa kayamanan ng kanilang pamilya. Alam natin kung ano ang nangyari kay San Francisco at sa mga kapatid na sumunod sa kanya sa pamumuhay nang dukha ayon sa Ebanghelyo.
Pero ano kaya ang nangyari sa kanyang ama? Matapos niyang itakwil ang kanyang anak, wala na siyang problema para ipunin at pangalagaan ang kanyang kayamanan.

balik calendario

Mayo 27
Martes

Ika-8 Linggo ng Taon
Augustin ng Kanterberi

Unang Pagbasa: 1 P 1:10-16
Ebanghelyo: Mc 10:28-31

Nagsalita naman si Pedro at sinabi: "Iniwan namin lahat para sumunod sa iyo." Sinabi ni Jesus: "Talagang sinasabi ko sa inyo: walang nag-iwan ng tahanan, mga kapatid, ina at ama at mga anak at mga bukid alang-alang sa akin at sa Ebanghelyo na walang gantimpala. Tatanggap nga siya ngayon ng makasandaang beses ng mga tahanan, mga kapatid, mga ina at mga anak at mga bukid sa gitna ng mga pag-uusig, at sa panahong darating nama'y makakamit niya ang buhay na walang hanggan.
"May mga una ngayon na mahuhuli at may mga huli naman na mauuna."

Pagninilay-nilay
Basahin mo uli ang pagbasa sa araw na ito. Sa mga nag-iwan ng tahanan, mga kapatid, ina at ama at mga anak at mga bukid nang dahil kay Jesus at sa Ebanghelyo, daan-daang tahanan, mga kapatid, mga ina at mga anak, at mga bukid ang tatanggapin nila sa kabila ng mga paghihirap sa buhay na ito. Anim na bagay ang binabanggit na iniwan pero limang bagay lang ang ipinapangakong tatanggapin nang makasandaang beses. Alin sa mga ito ang wala sa ipinangakong kapalit?
Oo, sa mag-iwan ng kanyang ama, hindi siya tatanggap ng daan-daang ama dahil iisa lang ang ama-ang Ama nating lahat sa langit!

balik calendario

Mayo 28
Miyerkules

Ika-8 Linggo ng Taon

Unang Pagbasa: 1 P 1:18-25
Ebanghelyo: Mc 10:32-45

Sa paglakad ni Jesus at ng kanyang mga alagad paahon sa Jerusalem, nanguna si Jesus at nagtaka sila. Natakot naman ang mga kasunod nila. Muli niyang isinama ang Labindalawa at habang nasa daan ay sinimulan niyang sabihin sa kanila ang mga sasapitin niya: "Tingnan ninyo, papunta na tayo sa Jerusalem. Doon ibibigay ang Anak ng Tao sa mga punong-pari at mga guro ng Batas na maghahatol sa kanya ng kamatayan. Kaya ibibigay nila siya sa mga pagano. Pagtatawanan nila siya, luluraan, hahagupitin at papatayin. Ngunit babangon siya pagkatapos ng tatlong araw."
Lumapit noon kay Jesus sina Jaime at Juan na mga anak ni Zebedeo, at sinabi sa kanya: "Guro, gusto sana naming gawin mo ang hihingin namin sa iyo." At sinabi ni Jesus: "Ano ang gusto ninyong gawin ko?" Sumagot sila: "Ipagkaloob mo sa amin sa iyong kaluwalhatian na maupo ang isa sa amin sa kanan mo, at ang isa naman sa kaliwa mo."
Sinabi ni Jesus: "Talagang hindi ninyo alam kung ano ang hinihingi ninyo. Maiinom ba ninyo ang kopang iinumin ko at mabibinyagan sa binyag na ibininyag sa akin?" Sumagot sila: "Kaya namin." Sumagot si Jesus: "Totoong iinom din kayo sa kopang iinumin ko at mabibinyagan sa binyag na ibibinyag sa akin. Ngunit wala sa akin ang pagpapaupo sa aking kanan o kaliwa. Inihanda ito para sa iba."
Nang marinig ito ng sampu, nagalit sila kina Jaime at Juan. Kaya tinawag sila ni Jesus at sinabi sa kanila: "Nalalaman ninyo na sinusupil ng mga naghahari ang kanilang mga bansa at inaapi ng mga nasa kapangyarihan. Huwag namang ganito sa inyo: ang may gustong m