Enero 1
Martes

Maria, Ina ng Diyos

Unang Pagbasa: Blg 6:22-27
Ikalawang Pagbasa: Gal 4:4-7
Ebanghelyo: Lc 2:16-21

Kaya nagmamadaling pumunta at natagpuan ng mga pastol si Maria at si Jose at ang sanggol na nakahiga sa sabsaban. Pagkakita rito, pinatotohanan nila ang pahayag na binigkas sa kanila tungkol sa batang ito. Namangha rin ang mga nakarinig sa mga sinasabi ng mga pastol.
Iningatan naman ni Maria ang mga ito at pinagnilay-nilay sa kanyang puso. Umuwi ang mga pastol na niluluwalhati at pinupuri ang Diyos dahil nakita nila ang lahat ng kanilang narinig ayon sa ipinasabi sa kanila.
Pagsapit ng ikawalong araw, kailangan nang tuliin ang bata; noon siya pinangalanang Jesus, ang itinawag sa kanya ng anghel bago pa siya ipinaglihi.

Pagninilay-nilay
Bago pa man tayo ipinaglihi ng ating mga ina, tinawag na rin tayo ng Diyos sa ating pangalan. Oo, bago pa man niya nilikha ang anuman, alam na ng Diyos ang ating pangalan. Hindi ba napakasarap sa pakiramdam na hindi pala tayo iba sa Diyos dahil kilalang-kilala niya tayo! Sa pasimula ng taong ito, narito ang ilang paanyaya sa atin ng Panginoon: ang tularan natin ang mga pastol sa pagluwalhati at pagpupuri sa Diyos habang ipinamamalita natin sa ating kapwa ang magagandang bagay na ginawa niya at ipinakita sa ating buhay, at ang maging totoo tayo sa pangalang binigkas at ibinigay sa ating Diyos bago pa man niya nilikha ang anuman-ang pangalan ng isang anak ng Diyos!

balik calendario

Enero 2
Miyerkules

Bago Mag-Epifania
Dakilang San Basilio at Gregorio Nazianzeno

Unang Pagbasa: 1 Jn 2:22-28
Ebanghelyo: Jn 1:19-28

Ito ang pagpapatunay ni Juan nang papuntahin sa kanya ng mga Judio ang ilang mga pari at Levita mula sa Jerusalem para tanungin siya: "Sino ka?" Inako niya at di ipinagkaila, inako nga niyang "Hindi ako ang Kristo."
At tinanong nila siya: "Ano ka kung gayon? Si Elias ka ba?" At sinabi niya: "Hindi." "Ang Propeta ka ba?" Isinagot naman niya: "Hindi." Kaya sinabi nila sa kanya: "Sino ka ba? Para may maisagot kami sa mga nagpapunta sa amin. Ano ba ang masasabi mo tungkol sa 'yong sarili?"
Sumagot siya gaya ng sinabi ni Propeta Isaias: "Tinig ako ng isang sumisigaw sa disyerto:Tuwirin ang daan ng Panginoon."
May mga pinapunta mula sa mga Pariseo. At tinanong nila siya: "Eh, ba't ka nagbibinyag kung hindi ikaw ang Kristo, ni si Elias, ni ang Propeta?" Sinagot sila ni Juan: "Sa tubig ako nagbibinyag ngunit may nakatayo sa piling ninyo na hindi n'yo kilala. Siya ang dumating na kasunod ko pero hindi ako karapat-dapat magkalag ng panali ng kanyang panyapak."
Sa Betaraba nangyari ang mga ito, sa kabilang-ibayo ng Jordan na pinagbibinyagan ni Juan.

Pagninilay-nilay
Dala ng sigasig ng marami sa atin, hindi lamang paghahatid ng Magandang Balita ang ating ginagawa, isinasaalang-alang din natin ang kaligtasan ng ating kapwa. Sinasabihan natin sila ng mga dapat at di-dapat nilang gawin upang mailigtas sila. At kapag nakita natin na hindi sila makasunod, tayo mismo ang nababagabag. Pero saan ba natin sila gustong maligtas? At sino nga bang talaga ang tunay na Tagapaglitas? Iisa lang ang Kristo-at hindi ikaw o ako o ang ibang tao iyon! Si Jesus ang Kristo at tayo ang mga tagapaghatid ng kanyang Mabuting Balita ng pagliligtas ng Diyos sa mundo. Siya ang Tagapaglitas kaya siya rin ang bahalang magligtas sa atin at sa ating kapwa.

balik calendario

Enero 3
Huwebes

Bago Mag-Epifania
Banal na Pangalan ni Jesus

Unang Pagbasa: 1 Jn 2:29-3:6
Ebanghelyo: Jn 1:29-34

Nakita ni Juan si Jesus na papalapit sa kanya kaya sinabi niya: "Hayan ang Kordero ng Diyos, sa kanya napapawi ang sala ng mundo. Ito ang tinutukoy ko nang sinabi kong 'Isang lalaki ang kasunod kong dumarating; nauna na siya sa akin pagkat bago ako'y siya na.'
"Wala nga akong alam sa kanya pero upang mahayag siya sa Israel ang dahilan kaya dumating akong nagbibinyag sa tubig."
At nagpatunay si Juan sa pagsasabing "Nakita ko ang Espiritu na bumababa mula sa langit gaya ng isang kalapati, at namalagi sa kanya. Wala nga akong alam sa kanya pero ang nagpadala sa akin na magbinyag sa tubig ang siya ring nagsabi sa akin: 'Kung kanino mo makitang bumababa ang Espiritu at namamalagi sa kanya, ito ang magbibinyag sa Espiritu Santo!" Nakita ko at pinatutunayan ko na siya nga ang hinirang Diyos."

Pagninilay-nilay
Panginoon, pangatlong araw pa lang ng Bagong Taon pero parang wala nang anumang bago sa taong ito. Tapos na ang maliligayang araw; tapos na rin ang magaganda kong balak gawin at simulan sa pagdating ng taong ito. Wala na rin ang aking mga New Year's resolution.
Panginoon, sa iyo lamang nagmumula ang aming lakas at pagbabago. Hinding-hindi ko mababago ang aking sarili kaya tulungan mo akong buksan ang aking puso sa iyong biyaya upang baguhin ako. Gisingin mo ako sa aking pagkahimlay upang matauhan sa katotohanan at makapagpatunay sa pamamagitan ng aking buhay na ikaw nga ang Tagapagligtas.

balik calendario

Enero 4
Biyernes

Bago Mag-Epifania
Elizabeth Ann Seton

Unang Pagbasa: 1 Jn 3:7-10
Ebanghelyo: Jn 1:35-42

Naroon sa Betaraba, sa kabilang ibayo ng Jordan si Juan at dalawa sa kanyang mga alagad. Pagdaan ni Jesus, tinitigan niya ito at sinabi: "Hayan ang Kordero ng Diyos." At narinig siyang nagsasalita ng dalawang alagad kaya sinundan nila si Jesus. Lumingon si Jesus at nakita niya silang sumusunod, at sinabi niya sa kanila: "Ano'ng hinahanap n'yo?" Sumagot naman sila sa kanya, "Rabbi (na kung isasalin ay Guro), saan ka namamalagi?" At sinabi niya sa kanila: "Halikayo at inyong makikita." At pumaroon sila at nakita kung saan siya namamalagi, at maghapon silang namalagi sa kanya. Mag-iikapat ng hapon ang oras noon.
Si Andres na kapatid ni Simon Pedro ang isa sa dalawang sumunod sa kanya pagkarinig kay Juan. Una niyang natagpuan ang kapatid niyang si Simon at sinabi sa kanya: "Natagpuan namin ang Mesiyas (na kung isasalin ay Pinahiran)." Inihatid niya siya kay Jesus. Tinitigan siya ni Jesus at sinabi: "Ikaw si Simon na anak ni Juan. Tatawagin kang Kefas (na kung isasalin ay Pedro)."

Pagninilay-nilay
Nakilala ko si Jia Wei noong Agosto 2006 sa Beijing, at pagkalipas ng ilang buwan, nagsimula siyang mag-aral ng katekesis sa South Cathedral para magpabinyag bilang Katoliko. Pero kaiba sa maraming Katoliko, hindi sapat para sa kanya ang basta lamang sumimba dahil sa simula pa lamang, iniimbitahan din niya ang kanyang mga kaibigan at kamag-aaral sa unibersidad na sumama sa kanya sa simbahan. Hindi pa nga siya nabibinyagan pero ginagawa na niya ang tungkulin ng isang binyagan-ang ipakilala si Kristo sa mga tao at ihatid sila sa kanya. Bininyagan si Jia Wei noong Pasko ng Pagkabuhay 2007 at patuloy pa rin ang pagdadala niya ng mga tao sa simbahan.

balik calendario

Enero 5
Sabado

Bago Mag-Epifania
Juan Neumann

Unang Pagbasa: 1 Jn 3:11-21
Ebanghelyo: Jn 1:43-51

Kinabukasan, niloob niyang lumabas pa-Galilea at natagpuan niya si Felipe. Sinabi ni Jesus sa kanya: "Sumunod ka sa akin." Taga-Betsaida si Felipe na kababayan nina Andres at Pedro. Natagpuan ni Felipe si Natanael at sinabi nito sa kanya: "Ang tinukoy ni Moises na nakasulat sa Batas at Mga Propeta, natagpuan namin siya-si Jesus na anak ni Jose, na taga-Nazaret."
Sinabi naman sa kanya ni Natanael: "May mabuti bang puwedeng manggaling sa Nazaret?" Sagot sa kanya ni Felipe: "Halika't makikita mo."
Nakita ni Jesus si Natanael na palapit sa kanya at sinabi niya tungkol sa kanya: "Hayan, isang totoong Israelitang walang pagkukunwari." Sinabi sa kanya ni Natanael: "Paano mo ako nakilala?" Sumagot sa kanya si Jesus: "Bago ka pa man tawagin ni Felipe, habang nasa ilalim ka ng punong-igos, nakita na kita."
Sumagot si Natanael: "Rabbi, ikaw ang Anak ng Diyos, ikaw ang Hari ng Israel." Sumagot si Jesus: "Sinabi ko lang sa iyong nakita kita sa ilalim ng punong-igos at naniniwala ka na? Higit pa sa mga ito ang makikita mo."
At idinugtong ni Jesus: "Talagang-talagang sinasabi ko sa inyo, makikita ninyong bukas na ang langit at panhik-panaog sa Anak ng Tao ang mga anghel ng Diyos."

Pagninilay-nilay
Marami ang nagsasabi na wala raw mabuting manggagaling sa bayan ng San Francisco, na dating Aurora ang pangalan, dahil isinumpa raw iyon noong araw. Pero sa kabila ng masamang pangalan nito, doon nanirahan si Dra. Pitt Ojeda at kung ilang pung taon na siya lamang ang tanging doktor sa bayang iyon. Nakita niya ang ganda ng bayan ng San Francisco, na lingid sa paningin kahit na ng mga tagaroon mismo. Mulat ang kanyang mga mata sa patuloy na pagpapala ng Diyos sa kanyang bayan. Retired na ngayon si Dra. Pitt at mas malimit na siya ngayon sa Metro Manila pero ngayo'y marami nang mabubuting galing sa San Francisco-isa na nga sa mga ito si Dra. Pitt.

balik calendario

Enero 6
Linggo

Epifania ng Panginoon

Unang Pagbasa: Is 60:1-6

Bumangon ka, magningning, pagkat dumating na ang iyong liwanag.
Ang kaluwalhatian ni Yawe sa iyo ay sumisikat. Masdan, balot pa ng dilim ang lupa, at ng makapal na ulap ang mga bayan. Ngunit sumisikat si Yawe sa iyo, at lumilitaw kanyang kaluwalhatian. Lumalakad ang mga bansa sa iyong liwanag, at ang mga hari sa ningning ng iyong bukanliwayway. Tumingin ka at masdan ang paligid: nagtitipon si-lang lahat at dumarating sa iyo. Dadalhin sa iyo ang yaman ng dagat, darating sa iyo ang yaman ng mga bansa. Matatabunan ka ng napakaraming kamelyo, mga batang kamelyo ng Madian at Efa. Darating lahat ng taga-Saba, may dalang ginto at insenso, at ipinapahayag ang papuri kay Yawe.

Ikalawang Pagbasa: Ef 3:2-3a, 5-6

Mga kapatid, narinig n'yo na siguro ang tungkol sa kinalabasan ng misyong bigay sa akin ng Diyos alang-alang sa inyo. Ipinaalam niya sa akin sa pagbubunyag ang mahiwagang balak na isinulat ko sa iilang salita lamang. Di pa ito ipinahahayag sa mga tao sa lumipas na panahon, kundi sa espiritu ito ibinunyag ngayon sa banal niyang mga apostol at mga propeta. Kay Kristo Jesus nagiging kapwa-tagapagmana at kaisang-katawan at kabahagi sa pangako ang mga bayang pagano.

Ebanghelyo: Mt 2:1-12

Pagkapanganak kay Jesus sa Betlehem sa Judea, sa panahon ni Haring Herodes, dumating sa Jerusalem ang ilang pantas mula sa Silangan. Nagtanong sila: "Nasaan ang bagong silang na hari ng mga Judio? Nakita namin ang pagsikat ng kanyang tala sa Silangan at naparito kami para sambahin siya."
Nang marinig ito ni Herodes, naligalig siya at ang buong Jerusalem. Ipinatawag niya kaagad ang buong kaparian at ang mga dalubhasa sa Batas, at itinanong sa kanila kung saan ipanganganak ang Mesiyas.
At sinabi nila: "Sa Betlehem ng Juda sapagkat ito ang isinulat ng Propeta: 'At ikaw, Betlehem, sa lupain ng Juda, hindi ikaw ang pinakaaba sa mga angkan ng Juda sapagkat sa iyo magmumula ang isang pinuno: siya ang magiging pastol ng aking bayang Israel.'"
Kaya lihim na tinawag ni Herodes ang mga pantas at hiningi sa kanila ang mga impormasyon tungkol sa sumikat na tala. At saka niya sila pinapunta sa Betlehem at sinabi: "Pumunta kayo at alamin ang tungkol sa bata. Pagkakita ninyo sa kanya, bumalik kayo sa akin para makapunta rin ako sa kanya at makasamba."
Umalis sila pagkarinig nila sa hari. Nagpauna sa kanila ang tala na nakita nila sa Silangan, at tumigil ito sa itaas ng lugar na kinaroroonan ng sanggol. Labis na natuwa ang mga pantas nang makita nilang muli ang tala! Pumasok sila sa bahay at nakita nila ang sanggol kasama ni Mariang kanyang ina. Lumuhod sila at sumamba, at binuksan ang kanilang mga mamahaling dala at hinandugan siya ng mga regalong ginto, kamanyang at mira.
At nag-iba sila ng daan pag-uwi nila sa kanilang lupain dahil binilinan sila sa pana-ginip na huwag nang bumalik kay Herodes.

Pagninilay-nilay
Tala. Hindi na karaniwang salita ang "tala" para sa maraming kabataan ngayon; mas alam nila ang salitang "bituin." Sa kasalukuyan, mas nakaugnay sa pagsilang ni Jesus ang kahulugan ng "tala"-ang bituing nagsilbing tanda ng kanyang pagsilang.
Tanda ang tala para lamang sa mga naghahanap sa pagdating ng Tagapagligtas sa mundo. Nagniningning ito sa langit para makita ng lahat pero ang mga tunay na naghahanap lamang ang makakakita at makauunawa nito.
Matagal na nating hinahanap ang Panginoon sa ating buhay at maaari ngang natagpuan na natin siya. Ano o sino ang nagsilbing tala para ihatid tayo sa kanya?

balik calendario

Enero 7
Lunes

Lunes, Pagkaraan ng Epifania
Raymundo Peñafort

Unang Pagbasa: 1 Jn 3:22-4:6
Ebanghelyo: Mt 4:12-17, 23-25

Nang marinig ni Jesus na dinakip si Juan, lumayo siya pa-Galilea. Hindi siya tumigil sa Nazaret, kundi sa Capernaum nanirahan, sa may baybayin ng lawa ng Galilea, sa teritoryo ng Zabulon at Neftali.
Kaya natupad ang salita ni Propeta Isaias: "Makinig kayo, mga lupain ng Zabulon at Neftali, mga daang patungo sa Dagat, kabilang ibayo ng Jordan; pakinggan ako, Galileang lupain ng mga pagano.
"Nakakita na ng malaking liwanag ang mga lugmok sa dilim. Sumikat na ang liwanag sa mga nasa anino ng kamatayan."
At magmula noon, sinimulang ipahayag ni Jesus ang kanyang mensahe: "Magbagong-buhay; lumapit na nga ang Kaharian ng Langit."
Nagsimulang maglibot si Jesus sa buong Galilea. Nagturo siya sa kanilang mga sinagoga, ipinahayag ang Mabuting Balita ng Kaharian at pinagaling ang kung anu-anong klase ng sakit at kapansanan ng mga tao.
Lumaganap sa buong Siria ang balita tungkol sa kanya. Kaya dinala sa kanya ang mga may karamdaman, ang lahat ng naghihirap dahil sa sakit, ang mga inaalihan ng demonyo, ang mga nasisiraan ng bait, ang mga paralitiko, at pinagaling niya silan.

Pagninilay-nilay
Tulad dapat ng pulot ang mga salita ng isang misyonero, ganito ang payo ni San Antonio Ma. Claret, para umakit sa mga tao, mga salitang matamis at kahali-halina sa pandinig. Tulad dapat ng magnet ang pagsasabuhay ng ating pananampalataya upang maakit natin ang ating kapwa sa pagsunod kay Jesus. Sa kasamaampalad, kabaligtaran ng mga salita ng Santo ang gawa ng marami sa atin. Hindi pulot kundi mapait na apdo ang ating mga salita; hindi magnet na umaakit kundi magnet na naglalayo at nagtataboy sa mga tao mula sa Diyos ang ating mga gawa. Ngunit pagsundo rin sa ating kapwa ang pagsunod sa Panginoon upang maihatid natin sila sa kanya.

balik calendario

Enero 8
Martes

Pagkaraan ng Epifania

Unang Pagbasa: 1 Jn 4:7-10
Ebanghelyo: Mc 6:34-44

Pagdating ni Jesus sa pampang, nakita niya ang maraming taong nagkakatipon doon at naawa siya sa kanila pagkat para silang mga tupang walang pastol. At nagsimula siyang magturo sa kanila nang matagal.
Nang humahapon na, lumapit sa kanya ang mga alagad at sinabi: "Nasa ilang na lugar tayo at lampas na ang oras." Paalisin mo sila nang makapunta sila sa mga nayon at bukid sa paligid at makabili ng kani-kanilang makakain."
Ngunit sumagot si Jesus sa kanila: "Kayo ang magbigay sa kanila ng makakain." Sinabi naman nila: "At kami pa pala ang bibili ng tinapay-dalawandaang denaryo, di ba? At bibigyan namin sila." Ngunit sinabi niya: "Ilang tinapay meron kayo? Sige, tingnan ninyo." At pagkatingin nila ay kanilang sinabi: "Lima at may dalawa pang isda."
Kaya iniutos niya sa kanila na paupuin nang grupu-grupo ang makapal na tao sa berdeng damuhan. At naupo silang grupu-grupo, tigsasandaan at tiglilimampu. Kinuha niya ang limang tinapay at dalawang isda, tumingala sa langit, nagpuri, hinati ang mga tinapay at ibinigay sa kanyang mga alagad para ibigay din nila sa mga tao. Gayundin naman, hinati niya ang dalawang isda.
At kumain silang lahat at nabusog, at inipon nila ang mga natirang pira-piraso; labindalawang punong basket ang mga piraso ng tinapay pati na ang mga piraso ng isda. Mga limanlibong lalaki ang napakain.

Pagninilay-nilay
Sa pagbasa natin sa bahaging ito ng Ebanghelyo, kapansin-pansin ang paglalarawan sa berdeng damuhan na kinaroroonan ng makapal na tao. At kung iisipin natin, makikita na para silang nagpiknik doon nang pagsaluhan nila ang tinapay at isda. Bukod dito, narito rin ang echo ng Salmo 23 na nagsasabing ang Panginoon ang ating Pastol na umaakay sa atin sa sariwang pastulan, sa berdeng damuhan.
Pansinin din tulad ng sa salaysay ng Huling Hapunan ang sunud-sunod na aksyong ginawa ni Jesus sa pamamahagi ng tinapay at isda. At doon sa sariwa at berdeng damuhan, pinagsaluhan nila ang Eukaristiya ng Panginoon.

balik calendario

Enero 9
Miyerkules

Pagkaraan ng Epifania
Nazareno

Unang Pagbasa: 1 Jn 4:11-18
Ebanghelyo: Mc 6:45-52

Agad na pinilit ni Jesus na sumakay sa bangka ang mga alagad at pinauna sa Betsaida sa kabilang ibayo habang pinaaalis niya ang mga tao. At pagkapaalis niya sa kanila, mag-isa siyang lumayo papunta sa kaburulan para manalangin.
Nasa laot na ang bangka nang gumabi at nag-iisa naman siyang nasa lupa. Nakita niya silang nahihirapan sa pagsagwan dahil pasalungat ang hangin. Kaya nang madaling-araw na, pinuntahan sila ni Jesus na naglalakad sa dagat at waring lalampas sa kanila. Nang makita nila siyang naglalakad sa dagat, akala nila'y multo siya. Kaya sumigaw sila. Nakita nga siya nilang lahat at nasindak sila. Ngunit agad niya silang kinausap: "Lakasan ang loob! Ako ito, huwag kayong matakot."
Nang nakasakay na siya sa bangka kasama nila, tumigil ang hangin kaya lalo pa silang namangha. Hindi nga nila naunawaan ang tungkol sa mga tinapay, kundi sarado ang kanilang isip.

Pagninilay-nilay
May maganda tayong salitang ginagamit para sabihin na sa kabila ng lahat ng hirap at problema sa buhay, patuloy pa rin tayong nabubuhay nang may pag-asa at tiwala na magiging mabuti pa rin ang lahat. Sinasabi nating "nakakaraos" pa rin tayo sa kabila ng patuloy na paglalakbay natin sa buhay pasalungat sa malakas na alon. At para sa ating mga alagad ni Jesus, nararanasan din natin na sa piling ng Panginoon, nagiging payapa ang dagat ng paghihirap at suliranin sa buhay. Naglalakad siya sa ibabaw ng alon para sabihin sa atin na wala tayong dapat ipangamba dahil kasama natin siya, kasabay natin siya at lagi niyang pinalalakas ang ating loob.

balik calendario

Enero 10
Huwebes

Pagkaraan ng Epifania

Unang Pagbasa: 1 Jn 4:19-5:4
Ebanghelyo: Lc 4:14-22

Nagbalik si Jesus sa Galilea, taglay ang kapangyarihan ng Espiritu at lumaganap sa buong kapaligiran ang balita tungkol sa kanya. Kinaugalian niyang magturo sa kanilang mga sinagoga, at pinupuri siya ng lahat.
Pagdating niya sa Nazaret, kung saan siya lumaki, pumasok siya sa sinagoga sa Araw ng Pahinga ayon sa kanyang kinaugalian. Tumindig siya para bumasa ng Kasulatan, at iniabot sa kanya ang aklat ni Propeta Isaias.
Sa paglaladlad niya sa rolyo, natagpuan niya ang lugar kung saan nasusulat: "Sumasaakin ang Espiritu ng Panginoon kayat pinahiran niya ako upang ihatid ang mabuting balita sa mga dukha. Sinugo niya ako upang ipahayag ang paglaya sa mga bilanggo, sa mga bulag ang pagkabawi ng paningin, upang bigyang-ginhawa ang mga api, at ipahayag ang taon ng kabutihang-loob ng Panginoon."
Binilot ni Jesus ang aklat, ibinigay ito sa tagapaglingkod at naupo. At nakatuon sa kanya ang mga mata ng lahat ng nasa sinagoga. Sinimulan niyang magsalita sa kanila: "Isinakatuparan ang Kasulatang ito ngayon habang nakikinig kayo."
At sumang-ayon silang lahat sa kanya habang nagtataka sa gayong pagpapahayag ng kabutihang-loob ng Diyos na nanggaling sa kanyang bibig. At sinabi nila: "Hindi ba't ito ang anak ni Jose?"

Pagninilay-nilay
Karaniwan na para sa atin na marinig at sabihin ang Mabuti o Magandang Balita ng Panginoon. Ngunit ano ba talaga ang maganda sa balitang ito ni Jesus? Magiging maganda lamang ang balita dahil may masamang sitwasyong kinakaharap ang pinagbabalitaan. Dahil kung mabuti na ang kanyang kalagayan sa buhay, wala nang anumang balita pa ang magiging maganda ang dating.
Bago natin malaman kung ano ang maganda sa balita ng Panginoon, kailangang maging mulat tayo kung ano ang hindi maganda sa ating kalagayan sa buhay. Ano o anu-ano ba ang nangangailangan ng magandang pagbabalitang ito ng Panginoon?

balik calendario

Enero 11
Biyernes

Pagkaraan ng Epifania

Unang Pagbasa: 1 Jn 5:5-13
Ebanghelyo: Lc 5:12-16

Nang nasa isang bayan si Jesus, may taong tadtad ng ketong doon. Nang makita niya si Jesus, nagpatirapa siya at nakiusap sa kanya: "Ginoo, kung gusto mo, mapalilinis mo ako."
Kaya iniunat ni Jesus ang kanyang kamay at hinipo siya at sinabi: "Gusto ko, luminis ka!" Nang oras ding iyo'y iniwan ng ketong ang lalaki. Iniutos sa kanya ni Jesus: "Huwag mo itong sabihin kanino man kundi pumunta ka sa pari para masuri ka niya at maialay alang-alang sa iyo ang handog na iniutos ni Moises para magkaroon sila ng patunay."
Ngunit lalo namang kumalat ang balita tungkol sa kanya at pumunta sa kanya ang maraming tao para makinig at mapagaling sa kanilang mga karamdaman. Kaya madalas na mag-isang pumupunta si Jesus sa mga ilang na lugar para manalangin.

Pagninilay-nilay
Mahirap din ang buhay ng isang taong sikat o popular, hindi ka basta-basta puwedeng mamasyal kahit saan mo naisin na pumunta, tiyak na dudumugin ka ng mga tao. At hindi ka rin puwedeng magsuot ng kahit na anong damit o gumawa ng anumang gusto mo dahil tiyak na nakatuon sa iyo ang mga mata ng lahat ng tao. Ganito ang nangyari kay Jesus sa pangangaral niya at pagpapagaling sa mga tao. Ngunit kaiba sa hangaring magkaroon ng privacy sa pamamasyal o sa mga gusto niya sa buhay, ang mapag-isa sa piling ng Diyos ang kanyang hinahanap-hanap. Kaya naman madalas siyang naghahanap ng mga ilang na lugar kung saan siya mag-isa sa piling ng Diyos.

balik calendario

Enero 12
Sabado

Pagkaraan ng Epifania

Unang Pagbasa: 1 Jn 5:14-21
Ebanghelyo: Jn 3:22-30

Pumunta si Jesus at ang kanyang mga alagad sa lupain ng Judea, at tumigil siya roong kasama nila at nagbinyag. Nagbibinyag din noon si Juan sa Ainon na malapit sa Salim dahil maraming tubig doon, at may mga nagsisidating at nagpapabinyag. Hindi pa nabibilanggo noon si Juan.
At nagkaroon ng pagtatalo ang mga alagad ni Juan at ang isang Judio tungkol sa paghuhugas. Pinuntahan nila si Juan at sinabi sa kanya: "Rabbi, ang kasa-kasama mo sa ibayo ng Jordan, na pinatunayan mo, nagbibinyag siya ngayon at sa kanya pumupunta ang lahat." Sumagot si Juan: "Walang anumang makukuha ang isang tao malibang ibigay ito sa kanya ng Langit. Kayo mismo ang makapagpapatunay na sinabi kong 'Hindi ako ang Mesiyas kundi sinugo akong manguna sa kanya.' Sa nobyo ang nobya. Naroon naman ang abay ng nobyo para makinig sa kanya at galak na galak siya sa tinig ng nobyo. Ganito ring lubos and aking kagalakan. Dapat siyang humigit at ako nama'y lumiit."

Pagninilay-nilay
Ano ang sinasabi mo pag may pumupuri sa iyo? Para sa ating mga Pilipino, kaugalian na nating itanggi ang anumang papuri sa atin ng ating kapwa; sinasabi nating "Hindi naman…" pero sabay-palakpak naman ang ating mga tenga.
Hindi pagpapakababa ang talagang kahulugan ng pagpapakumbaba kundi pagiging totoo sa sarili, ibig sabihi'y kilala mo kung sino kang talaga. Kung may pumuri sa iyo dahil sa mabuti mong gawa o maganda mong katangian, madali mo itong natatanggap kasabay ng pagsasabi ng "Salamat." At alam mo ring kaloob ng Diyos sa iyo ang lahat kaya sinasabi mo ring "Salamat sa Diyos."

balik calendario

Enero 13
Linggo

Ang Pagbibinyag sa Panginoon

Unang Pagbasa: Is 42:1-4, 6-7

Sinabi ng Panginoon, "Narito ang lingkod ko na aking inaalalayan, ang aking hinirang na kinalulugdan ng aking kaluluwa. Inilagay ko sa kanya ang aking Espiritu, at maghahatid siya ng katarungan sa mga bansa. Hindi siya hihiyaw ni sisigaw, ni magtataas ng tinig sa mga lansangan. Hindi niya babaliin ang sirang tambo, ni papa-tayin ang sindi ng ilawang aandap-andap. Palilitawin niya ang katarungan sa katotohanan. Hindi siya mag-uurong-sulong o masisiraan ng loob hanggang maitatag niya ang katarungan sa lupa. Hinihintay ng mga pulo ang kanyang batas.
Akong si Yawe ang tumawag sa iyo dahil sa katarungan. Hahawakan kita sa kamay at iingatan; gagawin kitang isang tipan para sa sambayanan at liwanag sa mga bansa upang imulat ang mata ng mga bulag, palayain sa bilangguan ang mga bihag, at pakawalan sa kulungan ang mga nasa dilim.

Slm 29:1-2, 3-4, 5, 9-10
Ipagkakaloob ng Panginoon ang kapayapaan sa kanyang bayan.

Ikalawang Pagbasa: Gawa 10:34-38

Nagsalita si Pedro, at sinabi: "Naiintindihan ko na ngayon na talaga ngang walang kinikilingan ang Diyos. Sa bawat bansa'y tinatanggap niya ang sinumang may-takot sa kanya at gumagawa ng tama.
"Ito ang salitang ipinadala niya sa bayang Israel, ang mabuting balita ng kapayapaang ipinahayag niya kay Jesucristong Panginoon ng lahat. Alam ninyo ang mga nangyari sa buong Judea, na nagsimula sa Galilea pagkatapos ng binyag na ipinangaral ni Juan. Hinirang nga ng Diyos si Jesus na taga-Nazaret sa Espiritu Santo at kapangyarihan. Saanman magpunta, siya'y gumagawa ng mabuti at nagpapagaling sa lahat ng nasa kapangyarihan ng diyablo dahil sumasakanya ang Diyos."

Ebanghelyo: Mt 3:13-17

Dumating noon si Jesus mula sa Galilea at lumapit kay Juan sa Ilog Jordan para magpabinyag. Pero tumanggi si Juan at sinabi: "Ako ang dapat na magpabinyag sa iyo, bakit ikaw ang lumapit sa akin?"
Ngunit sumagot sa kanya si Jesus: "Hayaan mo. Simulan natin sa simula." Kaya sumang-ayon si Juan.
Matapos mabinyagan, umahon si Jesus mula sa tubig. At agad na nabuksan ang langit at nakita niya ang Espiritu ng Diyos na bumababang parang kalapati at papunta sa kanya. Narinig kasabay nito ang boses mula sa langit na nagsabi: "Ito ang aking Anak, ang Minamahal, siya ang aking Hinirang."

Pagninilay-nilay
Binyag. Para sa ating mga Pilipino, hindi lamang sanggol ang binibinyagan dahil may binyag din tayo ng bahay, at pati na sapatos. Sa mas malawak na pagkaintindi natin sa binyag, makikita ang tunay na kahulugan nito.
Hindi binyag na sakramento ang tinanggap ni Jesus kay Juan. Nang panahong iyon, pagsang-ayon sa mga aral na itinuturo ng nagbibinyag at pagsunod sa kanya ang ibig sabihin ng binyag. At sa binyag ni Jesus, iyon din ang naging pasinaya o simula ng kanyang pangangaral at gawain.
Bilang mga binyagang tagasunod ni Jesus, nasimulan na rin ba natin ang makibahagi sa pamamahayag ng kanyang Mabuting Balita?

Enero 14
Lunes

Unang Linggo ng Taon

Unang Pagbasa: 1 S 1:1-8
Ebanghelyo: Mc 1:14-20

Pagkadakip kay Juan, pumunta si Jesus sa Galilea. Doon niya ipinahayag ang magandang balita ng Diyos sa pagsasabing "Sumapit na ang panahon; magbagong-buhay at maniwala sa magandang balita; lumapit na nga ang Kaharian ng Langit."
Sa pagdaan ni Jesus sa pampang ng lawa ng Galilea, nakita niya si Simon kasama si Andres na kapatid niya na naghahagis ng mga lambat sa lawa; mga mangingisda sila. Sinabi sa kanila ni Jesus: "Halikayo, sumunod kayo sa akin at gagawin ko kayong mangingisda ng tao." Agad nilang iniwan ang kanilang mga lambat at sumunod sa kanya.
Nagpatuloy pa siya nang kaunti, nakita naman niya ang magkapatid na Jaime at Juan na mga anak ni Zebedeo; nasa bangka sila at nagsusursi ng kanilang lambat. Tinawag sila ni Jesus. Agad nilang iniwan sa bangka ang kanilang amang si Zebedeo kasama ang mga tauhan nito, at umalis silang kasunod niya.

Pagninilay-nilay
Abalang-abala ang mga mangingisda sa kanilang gawain: may mga naghahagis ng lambat habang nagsusursi naman ang iba. Ngunit dumaan si Jesus sa kanilang buhay at sila ay tinawag. Pansinin na wala silang anumang isinagot sa pagtawag sa kanila ni Jesus. Ano pa nga bang sagot ang hihigit pa sa kanilang ginawa?
Agad nilang iniwan ang kanilang ginagawa, pati na ang kanilang mga kapamilya at sumunod kay Jesus. Walang pag-aatubili at ni walang anumang pagtatanong. Agad at walang anumang pagpapaliban o panahon ng pag-iisip.
Dumaraan din si Jesus sa ating buhay at tiyak na tinatawag din niya tayo. Ano naman kaya ang sagot mo sa kanyang tawag?

Enero 15
Martes

Unang Linggo ng Taon

Unang Pagbasa: 1 S 1:9-20
Ebanghelyo: Mc 1:21-28

Pumunta si Jesus at ang kanyang mga alagad sa Capernaum at nagturo siya sa sinagoga sa mga Araw ng Pahinga. Nagulat ang mga tao sa kanyang pangangaral sapagkat nangaral siya nang may kapangyarihan, hindi gaya ng mga guro ng Batas.
May tao sa sinagoga na inaalihan ng maruming espiritu. Sumigaw ito: "Ano ang kailangan mo sa akin, Jesus na taga-Nazaret? Para ipahamak kami kaya ka dumating. Alam ko kung sino ka: ang Banal ng Diyos."
Ngunit iniutos sa kanya ni Jesus: "Tumahimik ka't lumabas sa kanya." Matinding niyugyog ng espiritu ang taong iyon at pagkasigaw nang malakas ay saka lumabas.
Talagang takang-taka ang lahat at nag-usap-usap sila: "Ano ito? Bagong pagtuturo na may kapangyarihan! Inuutusan niya kahit maruruming espiritu at sinusunod nila siya." At lumaganap ang katanyagan niya saan man sa buong lupain ng Galilea.

Pagninilay-nilay
Mabuti pa ang masamang espiritu dahil alam nila kung bakit dumating ang Banal ng Diyos. Hindi lamang mga tao sa panahon ni Jesus ang may maling akala sa pagdating ni Jesus dahil hanggang ngayon, hindi pa rin maliwanag para sa atin kung bakit dumating si Jesus. Dumating si Jesus upang ialok ang regalo ng pagliligtas ng Diyos pero iginigiit pa rin natin hanggang ngayon na tayo ang magliligtas sa ating mga sarili sa pamamagitan ng mga gawa at sakripisyo. Ipinahayag ni Jesus ang Ebanghelyo ng katarungan at malasakit pero nananatili tayong mga Kristiyano lamang sa pangalan at binyag, at hindi sa gawa dahil wala pa rin tayong malasakit sa kapwa at nabubuhay sa kawalang-katarungan.

Enero 16
Miyerkules

Unang Linggo ng Taon

Unang Pagbasa: 1 S 3:1-10, 19-20
Ebanghelyo: Mc 1:29-39

Pagkaalis ni Jesus sa sinagoga, tumuloy si Jesus sa bahay nina Pedro at Andres, kasama sina Jaime at Juan. Doo'y nakahiga ang biyenan ni Pedro at may lagnat, at agad nila itong sinabi kay Jesus. Kaya lumapit siya, hinawakan ito sa kamay at ibinangon. Iniwan ng lagnat ang babae at ito mismo ang naglingkod sa kanila.
Pagkalubog ng araw, nang dumidilim na, dinala nila kay Jesus ang lahat ng maysakit o inaalihan ng masasamang espiritu. Nasa may pintuan nga ang buong bayan. Maraming may iba't ibang sakit ang pinagaling ni Jesus at maraming demonyo ang kanyang pinalayas ngunit hindi niya sila pinahintulutang magsalita pagkat alam nila kung sino siya.
Kinabukasan, maaga siyang bumangon at umalis. Pumunta siya sa isang ilang na lugar at doon siya nanalangin.
Hinanap siya nina Pedro, at pagkakita sa kanya ay kanilang sinabi: "Hinahanap ka ng lahat." Ngunit sinabi niya sa kanila: "Tayo na sa ibang lugar, sa maliliit na karatig-nayon para makapangaral din ako roon; dahil dito kaya nga ako lumabas."
At naglibot siyang nangangaral sa kanilang mga sinagoga sa buong Galilea at nagpapalayas ng mga demonyo.

Pagninilay-nilay
Ipinapalagay ng ilan na hindi puwedeng sumunod at maglingkod sa Panginoon nang buo ang mga may-asawa. Pero hindi ganito ang simula ng ating pamayanang Kristiyano. Alangan namang may biyenan si Pedro ngunit walang asawa? Pero bakit ang biyenan lamang ni Pedro ang binabanggit sa Ebanghelyo at wala itong sinasabi tungkol sa kanyang misis? Ano kaya ang ginagawa ni Mrs. San Pedro? Kung iniwan ni Pedro ang kanyang pamilya nang sumunod siya kay Jesus, lalabas na iresponsable siyang asawa at ama. Hindi niya ipagkakait sa kanyang asawa at mga anak ang magandang pagkakataon ng pagsunod sa Panginoon. Kaya malamang na kasama ng mga apostol ang kanilang mga pami-pamilya.

Enero 17
Huwebes

Unang Linggo ng Taon
Antonio

Unang Pagbasa: 1 S 4:1-11
Ebanghelyo: Mc 1:40-45

Lumapit kay Jesus ang isang mayketong at nakiusap sa kanya: "Kung gusto mo, mapalilinis mo ako." Nahabag si Jesus sa kanya, iniunat ang kanyang kamay, hinipo siya at sinabi: "Gusto ko, luminis ka!" Nang oras ding iyon, iniwan ang lalaki ng kanyang ketong at luminis siya.
Ngunit mahigpit siyang pinagbilinan ni Jesus sa kanyang pag-alis, sinabi niya: "Mag-ingat ka, huwag mo itong sabihin kaninuman, kundi pumunta ka sa pari para masuri ka niya at maialay alang-alang sa pagkalinis sa iyo ang handog na iniutos ni Moises upang magkaroon sila ng patunay."
Ngunit pagkaalis ng tao, sinimulan niyang ipahayag ito kahit saan at ipamalita ang pangyayaring ito. Dahil dito, hindi na lantarang makapasok sa bayan si Jesus kundi nanatili siya sa labas, sa mga ilang na lugar. Ngunit may dumarating pa rin sa kanya na kung saan-saan galing.

Pagninilay-nilay
Panginoon, ikaw ang higit na nakakakilala sa akin. Oo, higit pa sa pagkakilala ko sa aking sarili. Alam mong kung ilang beses ko nang sinikap na magbago pero ganito pa rin ako-puno at tadtad ng ketong ng kasalanan at pagkamakasarili.
Ngunit sa kabila ng lahat ng ito, tinatanggap mo pa rin ako at patuloy na minamahal. Ipakilala mo nawa at ipaunawa sa akin kung bakit ako ganito. Bigyan mo ako ng malawak na pang-unawa upang mas makilala at matanggap ang aking sarili. Pagkalooban mo rin ako ng tiyaga upang mapagpasensyahan ko ang aking sariling kahinaan at pagkukulang. Turuan mo akong maipaubaya sa iyo na mabago ako at mapagaling sa tunay na panahon na nais mo.

Enero 18
Biyernes

Unang Linggo ng Taon

Unang Pagbasa: 1 S 8:4-7, 10-22a
Ebanghelyo: Mc 2:1-12

Pagkaraan ng ilang araw, pumasok si Jesus sa Capernaum. Nang mabalitang nasa bahay siya, marami ang nagtipon doon kaya wala nang lugar kahit sa may pintuan. At ipinahayag niya ang Salita. May mga tao namang dumating at dinala sa kanya ang isang paralitiko, na buhat-buhat ng apat.
At nang hindi sila makalapit kay Jesus dahil sa dami ng tao, inalis nila ang mga tisa ng terasang nasa ibabaw ng kinaroroonan ni Jesus at pagkabukas nila nito, inihugos nila ang paralitiko na nasa higaan.
Nang makita ni Jesus ang kanilang pananalig, sinabi niya sa paralitiko: "Anak! Pinatawad na ang iyong mga kasalanan."
May ilang guro ng Batas naman na nakaupo roon at inisip nila: "Ano itong sinasabi niya? Talagang iniinsulto niya ang Diyos. Sino ba ang may kapangyarihang magpatawad ng mga kasalanan? Di ba't ang Diyos lamang?"
At agad na nalaman ni Jesus sa kanyang espiritu na ganoon ang kanilang mga niloloob na kaisipan. Kaya sinabi niya sa kanila: "Ano ang mga kaisipan ninyong ito? Ano ba ang mas madaling sabihin sa paralitiko: 'Pinatawad na ang iyong mga kasalanan' o 'Tumayo ka, kunin ang iyong higaan at lumakad'? Dapat ninyong malaman na sa lupa ay may kapangyarihan ang Anak ng Tao na magpatawad ng kasalanan."
At sinabi niya sa paralitiko: "Iniuutos ko sa iyo: bumangon ka, dalhin mo ang iyong higaan at umuwi." At bumangon nga ang tao, agad na kinuha ang higaan at lumabas na nakikita ng lahat. Lubhang namangha ang lahat at nagpuri sila sa Diyos sa pagsasabing "Kailanma'y hindi pa kami nakakakita ng ganito."

Pagninilay-nilay
Panoorin mo sa iyong isipan ang eksenang isinasalaysay sa pagbasa. Naroon ang maraming tao na nakapalibot kay Jesus, nakikinig sa kanyang mga salita at naghihintay na pagalingin ang kanilang mga maysakit. Naroon ding dumarating ang apat na tao, buhat nila ang paralitiko. At dahil hindi sila makalapit kay Jesus, sa bubungan ng bahay nila idinaan ang maysakit. Panoorin mo ang reaksyon ni Jesus sa kanilang ginawa. Naroon din ang mga taong nagbulung-bulungan at kung anu-ano ang sinasabi sa ginawang pagpapagaling ni Jesus. At pagkatapos mapagaling ni Jesus ang paralitiko, panoorin mo ang pagkamangha ng lahat.
Sino ka sa mga tauhan sa eksenang ito? Bakit?

Enero 19
Sabado

Unang Linggo ng Taon

Unang Pagbasa: 1 S 9:1-4, 17-19; 10:1
Ebanghelyo: Mc 2:13-17

Muling pumunta si Jesus sa tabing-dagat at lumapit din sa kanya ang lahat. Kaya nagturo siya sa kanila.
Nakita naman niya sa paglalakad si Levi na anak ni Alfeo, na nakaupo sa singilan ng buwis at sinabi niya rito: "Sumunod ka sa akin." At tumayo ito at sinundan siya.
Habang nanunuluyan si Jesus sa bahay ni Levi, maraming tagasingil ng buwis at iba pang makasalanan ang nakisalo kay Jesus at sa kanyang mga alagad. Talaga ngang marami sila. Ngunit may mga guro ng Batas namang sumusunod sa kanya. Nang makita nila na nasa hapag siya kasama ng mga makasalanan at maniningil ng buwis, sinabi nila sa kanyang mga alagad: "Ano! kumakain siyang kasama ng mga makasalanan at maniningil ng buwis?"
Nang marinig ito ni Jesus, sinabi niya sa kanila: "Hindi ang malulusog ang nangangailangan ng doktor kundi ang mga maysakit! Hindi ako pumarito para tawagin ang mabubuti kundi ang mga makasalanan."

Pagninilay-nilay
Noon pa man, makasalanan ang mga maniningil ng buwis! Pero sa ngayon, tinawag na sila ni Jesus bago pa man sila naging maniningil ng buwis. At hindi lamang ito ang kaibahan dahil kahit na mga Kristiyano ang mga maniningil ng buwis, hindi nila nakikita na makasalanan sila.
May lugar lamang si Jesus sa ating buhay kung tanggap natin na makasalanan tayo kayat nangangailangan tayo ng Tagapagligtas. Paano niya tayo mapagagaling kung itinatanggi naman nating wala tayong sakit?
Panginoon, buksan mo ang aking isipan upang makilala ko ang aking kahinaan at kasalanan; bigyan mo ako ng lakas upang maamin ito sa aking buhay.

balik calendario

Enero 20
Linggo

Santo Niño
Ika-2 Linggo ng Taon

Unang Pagbasa: Is 9:1-6

Ang bayang nagsisilakad sa karimlan ay nakakita ng malaking liwanag, liwanag na nagliwayway sa mga nasa lupain ng anino ng kamatayan. Pinalawak mo ang bansa, dinagdagan ang kanilang ligaya. Nagagalak sila sa harap mo, tulad ng pagkagalak kung tag-ani, o kung naghahati-hati sa nasamsam. Tulad nang malupig ang Madian, binali mo ang pamatok nilang pasan, ang balagwit sa kanilang balikat, ang latigo ng kanilang kapatas. Bawat botang yumayabag sa digmaan, bawat unipormeng namantsahan ng dugo ay itatapon sa siga at lalamunin ng apoy. Sapagkat isang sanggol ang sa ati'y isinilang, anak na lalaking kaloob sa atin. Sagisag ng kapangyariha'y nasa kanyang balikat, at inihayag ang kanyang pangalan: "Kahanga-hangang Tagapayo, Makadiyos na Mandirigma, Amang Walang-hanggan, Prinsipe ng Kapayapaan."
Mag-iibayo ang kanyang kapangyarihan at kapayapaa'y walang katapusan. Maghahari siya sa trono ni David at sa buo niyang kaharian. Itatayo iyon at patatatagin sa katarungan at pagkamatuwid mula ngayon at magpakailanman. Oo, gagawin ito ng selosong pag-ibig ni Yawe ng mga Hukbo.

Slm 97:1, 2-3, 3-4, 5-6
Umawit kayo sa Panginoon ng bagong awitin, kahanga-hanga ang mga ginawa niya.

Ikalawang Pagbasa: Ef 1:3-6, 15-18

Pasalamatan ang Diyos na Ama ni Jesucristong ating Panginoon! Pinagpala niya tayo mula sa kalangitan, kay Kristo, ng bawat pagpapalang espirituwal; hinirang na nga niya tayo sa kanya bago pa nilalang ang mundo upang tayo'y maging banal at walang kasalanan sa paningin niya. Sa pag-ibig, itinalaga niya tayong ampunin mula sa kawalang-hanggan sa pamamagitan ni Jesucristo at para sa kanya, ayon sa mapagmahal na kalooban niya, upang purihin ang maringal na kaloob niyang nasa Minamahal na ipinagkaloob niya sa atin.
Nabalitaan ko rin naman ang inyong pananampalataya at ang inyong pagmamahal sa lahat ng banal. Kaya walang tigil akong nagpapasalamat sa Diyos dahil sa inyo at inaalaala ko kayo sa aking mga panalangin. Bigyan nawa kayo ng Diyos na Ama ni Jesucristong Panginoon ng karunungan at pagkatuklas na bunga ng Espiritu upang lubusan ninyo siyang makilala.
Liwanagan nawa niya ang inyong mga kalooban upang malaman ninyo kung ano ang aasahan ninyo sa pagkatawag niya sa inyo, kung ano ang kayamanan ng maluwalhati niyang pamana sa mga banal.

Ebanghelyo: Mt 18:1-5, 10

Nang panahong iyon, lumapit kay Jesus ang mga alagad at tinanong nila siya: "Sino ang mas una sa kaharian ng Langit?"
Tinawag ni Jesus ang isang maliit na bata at ipinagitna sa kanila, at sinabi: "Sinasabi ko sa inyo na hanggang hindi kayo nagbabago at nagiging katulad ng maliliit na bata hindi kayo makapapasok sa kaharian ng Langit. Ang nagpapakababa gaya ng maliit na batang ito, siya ang pinakamalaki sa kaharian ng Langit. At ako ang tinatanggap ng sinumang tumatanggap sa batang ito sa aking pangalan.
"Huwag sana ninyong hamakin ang isa sa maliliit na ito; talagang sinasabi ko sa inyo na laging nasa harap ng aking Ama sa Langit ang kanilang mga anghel sa Langit."

Pagninilay-nilay
Bata. Malapit sa ating mga puso ang mga bata. Cute ang tingin natin sa kanila; mga wa-lang-malay at parang mga anghel. Hindi ba't madalas pa ay pinipisil natin ang kanilang mga pisngi kasabay ng panggigigil natin sa kanila?
Hindi naman ganito ang tingin ng mga tao sa mga bata sa panahon ng Matanda at Ba-gong Tipan. Nang panahong iyon, hindi "tao" ang turing nila sa mga bata kundi kabilang sila sa ari-arian ng ama ng sambahayan, gaya ng mga baka at iba pang mga hayop, pati ng kanilang maybahay.
Sa ganitong kahulugan natin dapat unawain ang mga salita ni Jesus tungkol sa mga bata-pakikipagkapwa-tao ito sa mga hindi tinatao ng iba!

balik calendario

Enero 21
Lunes

Ika-2 Linggo ng Taon
Agnes

Unang Pagbasa: 1 S 15:16-23
Ebanghelyo: Mc 2:18-22

Minsa'y nag-aayuno ang mga alagad ni Juan at ang mga Pariseo. Kaya may lumapit kay Jesus at nagtanong: "May araw ng ayuno ang mga alagad ni Juan at ang mga alagad ng mga Pariseo, at wala ba namang pag-aayuno ang iyong mga alagad?"
Sinagot sila ni Jesus: "Puwede bang mag-ayuno ang mga abay sa kasalan kapag kasama pa nila ang nobyo? Darating ang panahon na kukunin sa kanila ang nobyo; sa araw na iyon sila mag-aayuno.
"Walang nagtatagpi ng piraso ng bagong tela sa lumang damit. Kung gagawin mo ito, hihilahin ng tagpi ang damit, ng bago ang luma at lalo pang lalaki ang punit. At hindi ka rin naman maglalagay ng bagong alak sa mga lumang sisidlan. Kung gagawin mo ito, papuputukin ng alak ang mga sisidlan at masisira ang alak pati na ang mga sisidlan. Sa bagong sisidlan ang bagong alak!"

Pagninilay-nilay
Mahirap pa rin sa atin hanggang ngayon na tanggapin at unawain ang mga salita ni Jesus dahil gusto pa rin nating bumalik sa kinagawian nating mga pagsasakripisyo at pagpapakasakit. Gusto nating pahirapan ang ating sarili dahil pagkatapos nito, nakadarama tayo ng gaan ng kalooban at nasisiyahan tayo dahil meron tayong ginawa.
Ngunit relihiyon ng pagdiriwang sa ating buhay bilang mga taong tinubos at mahal ng Diyos ang ipinahayag sa atin ni Jesus. Regalo sa atin ng Diyos ang buhay, pati na ang ating kaligtasan, at wala tayong ibang dapat gawin kundi tanggapin ito nang maluwag sa ating kalooban at magsaya dahil dito!

balik calendario

Enero 22
Martes

Ika-2 Linggo ng Taon

Unang Pagbasa: 1 S 16:1-13
Ebanghelyo: Mc 2:23-28

Naglakad si Jesus sa mga taniman ng trigo minsang Araw ng Pahinga. At habang nag-lalakad ang kanyang mga alagad, sinimulan nilang alisin sa uhay ang mga butil, at kinain iyon. At sinabi kay Jesus ng mga Pariseo: "Tingnan mo ang ginagawa nila sa Araw ng Pahinga. Hindi ito ipinahihintulot."
Ngunit sumagot si Jesus: "Hindi n'yo ba nabasa kailanman ang ginawa ni David nang nangangailangan siya at nagugutom, siya at ang kanyang mga kasama? Pumasok siya sa bahay ng Diyos nang si Abiatar ang Punong-pari, at kinain ang tinapay na inihain para sa Diyos gayong bawal ito kaninuman liban sa mga pari, at binigyan pa niya pati kanyang mga kasama." At sinabi pa sa kanila ni Jesus: "Dahil sa tao kaya ginawa ang Araw ng Pahinga ngunit hindi ang tao dahil sa Araw ng Pahinga. Kung gayon, ang Anak ng Tao ang Panginoon kahit na ng Araw ng Pahinga."

Pagninilay-nilay
Noong araw, matrabaho ang magluto ng gulaman dahil matapos itong pakuluan, kailangan pa itong salain sa katsa para alisin ang dumi. Ngayo'y may iba't ibang klase na ng gulaman: may pulbos na hindi na kailangan pakuluan kundi tinitimpla na lang sa mainit na tubig. May mga gulaman bar pa rin pero hindi na kailangang salain pa matapos pakuluin. May nabibili na ring mga gulaman na ready-to-eat.
Hindi tulad ng gulaman ang tunay na pagsasadiyos dahil dumadaloy ito dapat sang-ayon sa nagbabagong kalagayan sa buhay at sa mga hinihingi ng kasalukuyang panahon. Tulad ito ng ihip ng hangin sang-ayon sa bugá ng Espiritu.

balik calendario

Enero 23
Miyerkules

Ika-2 Linggo ng Taon

Unang Pagbasa: 1 S 17:32-33, 37, 40-51
Ebanghelyo: Mc 3:1-6

Muling pumasok si Jesus sa sinagoga, at may lalaki roon na hindi maigalaw ang kamay, at may mga gusto ring magsumbong tungkol kay Jesus. Kaya nagmasid sila at baka pagalingin siya ni Jesus sa Araw ng Pahinga.
At sinabi naman niya sa taong hindi maigalaw ang kamay: "Tumindig ka sa gitna." At saka niya sila tinanong: "Ano ang ipinahihintulot sa Araw ng Pahinga, gumawa ng mabuti o gumawa ng masama, magligtas ng buhay o pumatay?" At di sila umimik.
Nalungkot si Jesus dahil sa katigasan ng kanilang puso kaya galit niyang tiningnan silang lahat, at sinabi sa lalaki: "Iunat mo ang iyong kamay." Iniunat nga ng tao ang kamay at gumaling ito.
Pagkalabas ng mga Pariseo, nakipagtipon sila sa mga kakampi ni Herodes para masiraan nila siya.

Pagninilay-nilay
Panginoon, sa pagsunod namin sa iyo bilang mga Kristiyano, madali naming napahahalagahan ang mga kautusan at mga regulasyon kaysa tunay na mahalaga para sa iyo-ang kapakanan at ikabubuti ng tao.
Turuan mo kami na makita ang tunay na mahalaga upang huwag naming husgahan ang sinumang gumagawa para sa ikabubuti ng aming kapwa, at sa halip, magkaroon nawa kami ng lakas ng loob na makiisa sa kanyang ginagawa.
Sabihin mo rin sa amin na iunat namin ang aming mga kamay; pagalingin mo kami sa paralisis ng aming mga puso na humahadlang sa amin sa mga gawa ng malasakit sa kapwa.

balik calendario

Enero 24
Huwebes

Ika-2 Linggo ng Taon
Francisco de Sales

Unang Pagbasa: 1 S 18:6-9, 19:1-7
Ebanghelyo: Mc 3:7-12

Lumayo si Jesus na kasama ang kanyang mga alagad papunta sa dagat. Maraming taga-Galilea ang sumunod sa kanya.
Mayroon din namang mga taong galing sa Judea at Jerusalem, at sa Idumea at sa kabilang ibayo ng Jordan, at sa Tiro at Sidon. Maraming-marami ang nagpunta sa kanya nang mabalitaan nila ang lahat niyang ginagawa.
Kaya tinagubilinan niya ang kanyang mga alagad na ihanda ang isang bangka para sa kanya dahil maraming tao, at baka nila siya maipit. Marami na siyang pinagaling kaya pilit siyang inaabot ng lahat ng may karamdaman para mahipo siya. Sinusugod siya ng mga inaalihan ng maruruming espiritu pagkakita sa kanya at pasigaw nilang si-nasabi: "Ikaw ang Anak ng Diyos." Ngunit tinagubilinan niya silang huwag siyang ibunyag.

Pagninilay-nilay
Hindi puwedeng magmisyon sa China ang mga dayuhang misyonero; ni hindi rin puwedeng magmisa sa mga simbahan ang mga paring banyaga. Kailangang humingi muna sila ng permiso sa gobyerno. Ngunit mga karaniwang Katoliko ang gagawa sa hindi hayagang magagawa ng mga pari at madre! Dahil sa ilang Filipino couples, may Couples for Christ na sa Guangzhou, Beijing at Shanghai! Nagsimula ang CFC sa mga siyudad na iyon bilang pagpapatuloy ng samahan at gawain ng mga Pilipino. Ang pagpapatuloy na iyon ang naging daan upang makibahagi rin ang mga Intsik sa kanilang samahan.
Ipanalangin natin ang CFC na patuloy nilang maihatid si Kristo sa China.

balik calendario

Enero 25
Biyernes

Pagbabagumbuhay ni Pablo

Unang Pagbasa: Gawa 22:3-16 (o Gawa 9:1-22)
Ebanghelyo: Mc 16:15-18

Sinabi ni Jesus sa kanyang mga alagad: "Pumunta kayo sa buong daigdig at ipahayag ang ebanghelyo sa buong sangkinapal. Maliligtas ang maniniwala at magpapabinyag; hahatulan naman ang di maniniwala. At ito ang mga tandang sasama sa mga maniniwala: magpapalayas sila ng mga demonyo sa aking Pangalan, magsasalita sila sa iba pang mga wika, hahawakan nila ang mga ahas, at di sila maaano kung iinom man sila ng may lason. Ipapatong nila ang kanilang kamay sa mga maysakit at gagaling ang mga iyon."

Pagninilay-nilay
Buung-buo ang paniwala ni Pablo na tama at kalooban ng Diyos ang ginagawa niyang pag-uusig sa mga sumusunod sa Daan ni Jesus. Hindi lamang siya totoo sa kanyang sarili kundi bukás din siya sa katotohanan. Kaya nang ihayag mismo ni Jesus ang katotohanan na siya ang Panginoon, ibinaling ni Pablo ang lahat niyang lakas at sigasig, hindi sa pag-uusig sa mga Kristiyano, kundi sa pamamahayag kay Kristo sa lahat ng bansa! Pumunta siya sa buong daigdig at ipinahayag ang Ebanghelyo kayat lumaganap sa mundo ang hamak na kilusang nagsimula sa maliit at liblib na lugar.

balik calendario

Enero 26
Sabado

Ika-2 Linggo ng Taon
Timoteo at Tito

Unang Pagbasa: 2 Tim 1:1-8 (o Tito 1:1-5)
Ebanghelyo: Lc 10:1-9

Humirang ang Panginoon ng iba pang pitumpu't dalawa at isinugo silang dala-dalawa na mauna sa kanya sa bawat bayan at lugar na takda niyang puntahan. Sinabi niya sa kanila: "Marami nga ang aanihin at kakaunti naman ang mga manggagawa; idalangin ninyo sa panginoon ng ani na magpadala siya ng mga manggagawa sa kanyang ani. Lumakad na kayo. Isinusugo ko kayong parang mga tupa sa gitna ng mga asong-gubat. Huwag kayong magdala ng pitaka, bag o mga sandalyas. At huwag ninyong batiin ang sinuman sa daan.
"Saanmang bahay kayo pumasok, sabihin muna ninyo: 'Mapasatahanang ito ang kapayapaan!' Kung mapayapang tao ang naroon, sasakanya ang inyong kapayapaan. Hung hindi'y magbabalik sa inyo ang inyong dasal. At sa bahay na iyon kayo manatili; kumain kayo at uminom na kasalo nila sapagkat may karapatan ang manggagawa sa kanyang sahod. Huwag kayong magpalipat-lipat ng bahay.
"Saanmang bayan kayo pumasok at tanggapin nila kayo, kanin ninyo anumang ihain sa inyo. Pagalingin din ninyo ang mga maysakit doon at sabihin ninyo sa kanila: 'Palapit na sa inyo ang kaharian ng Diyos.'"

Pagninilay-nilay
Karaniwan nating sinasabi na para patotohanan sa kanilang buhay ang pagmamahal at malasakit sa kapwa kaya isinugo sila ni Jesus nang dala-dalawa. At kung magkasama ang mga tagapagpahayag ng Mabuting Balita, kapwa nila maaalalayan ang isa't isa.
Nang panahong iyon, hindi maaaring makipag-usap ang mga babae, may-asawa man o wala, sa mga lalaki. Sa gayong kalagayan, mga lalaki lang ang puwedeng kausapin at pagpahayagan ng mga isinugo… kung mga lalaki silang lahat. Narito ang mas magandang paliwanag kung bakit dala-dalawa. Dala-dalawa dahil mga mag-asawa ang isinugo ng Panginoon para ipahayag ang Ebanghelyo.

balik calendario

Enero 27
Linggo

Ika-3 Linggo ng Taon

Unang Pagbasa: Is 8:23-9:3

Nitong una'y halos lipulin ni Yawe ang lupain ng Zabulon at Neftali, ngunit pagkatapos nito'y binigyang-luwalhati niya ang daang patungo sa dagat at ang Galilea ng mga pagano sa kabilang ibayo ng Jordan.
Ang bayang nagsisilakad sa karimlan
ay nakakita ng malaking liwanag,
liwanag na nagliwayway
sa mga nasa lupain ng anino ng kamatayan.
Pinalawak mo ang bansa,
dinagdagan ang kanilang ligaya.
Nagagalak sila sa harap mo,
tulad ng pagkagalak kung tag-ani,
o kung naghahati-hati sa nasamsam.
Tulad ng malupig ang Madian,
binali mo ang pamatok nilang pasan,
ang balagwit sa kanilang balikat,
ang latigo ng kanilang kapatas.

Slm 27:1, 4, 13-14
Ang Panginoon ang siyang liwanag at kaligtasan.

Ikalawang Pagbasa: 1 Cor 1:10-13, 17

Nakikiusap ako sa inyo, mga kapatid, sa ngalan ng ating Panginoong Jesucristo, na magkasundo kayong lahat. Mawala na sana ang inyong mga pagtatalo. Magkaisa nawa kayo sa iisang diwa at pagpapasya.
Sapagkat ipinarating sa akin ng mga tao ni Cloe na mayroon kayong pagtatalo, mga kapatid ko. Ito ang aking tinutukoy-sinasabi ng isa't isa sa inyo: "Kay Pablo ako," o "Kay Apollo ako," o "Kay Kefas ako," o "Kay Kristo ako." Hati ba si Kristo? Si Pablo ba ang ipinako sa krus para sa inyo? O bininyagan ba kayo sa ngalan ni Pablo?
Hindi nga ako isinugo ni Kristo upang magbinyag kundi upang ipangaral ang ebanghelyo. At hindi sa mapagmarunong na pananalita, upang di mapawalang-bisa ang krus ni Kristo.

Ebanghelyo: Mt 4:12-17, 23-25

Nang marinig ni Jesus na dinakip si Juan, lumayo siya pa-Galilea. Hindi siya tumigil sa Nazaret, kundi sa Capernaum nanirahan, sa may baybayin ng lawa ng Galilea, sa teritoryo ng Zabulon at Neftali.
Kaya natupad ang salita ni Propeta Isaias: "Makinig kayo, mga lupain ng Zabulon at Neftali, mga daang patungo sa Dagat, kabilang ibayo ng Jordan; pakinggan ako, Galileang lupain ng mga pagano.
"Nakakita na ng malaking liwanag ang mga lugmok sa kadiliman. Sumikat na ang liwanag sa mga nasa anino ng kamatayan."
At magmula noon, sinimulang ipahayag ni Jesus ang kanyang mensahe: "Magbagong-buhay; lumapit na nga ang Kaharian ng Langit."
Nagsimulang maglibot si Jesus sa buong Galilea. Nagturo siya sa kanilang mga sinagoga, ipinahayag ang Mabuting Balita ng Kaharian at pinagaling ang kung anu-anong klase ng sakit at kapansanan ng mga tao.
Lumaganap sa buong Siria ang balita tungkol sa kanya. Kaya dinala sa kanya ang mga may karamdaman, ang lahat ng naghihirap dahil sa sakit, ang mga inaalihan ng demonyo, ang mga nasisiraan ng bait, ang mga paralitiko, at pinagaling niya silang lahat. Sinundan siya ng maraming taong galing sa Galilea, sa Sampung Lunsod, sa Jerusalem, sa Judea at sa kabilang ibayo ng Jordan.

Pagninilay-nilay
Liwanag. Dahil sa liwanag nakakakita tayo ng iba't ibang kulay; kung walang liwanag, wala ring anumang mabubuhay sa mundo. Liwanag ang patuloy na bumubuhay at nagbibigay-lakas sa lahat
Mula sa simula ng Genesis, naroon na ang liwanag. Liwanag pa rin ang patuloy na hahanapin ng bayan ng Diyos sa mga madilim na yugto ng kanilang kasaysayan kasabay ng pangako ng Diyos na sasapit ang panahon na isang malaking liwanag ang sisikat sa kanila.
Dumating na ang Liwanag na iyon-si Jesus na siyang tunay na Araw na sumisikat sa ating buhay. Pero talaga nga bang sa liwanag na iyon tayo nabubuhay?

balik calendario

Enero 28
Lunes

Ika-3 na Linggo ng Taon
Tomas Aquino

Unang Pagbasa: 2 S 5:1-7, 10
Ebanghelyo: Mc 3:22-30

May dumating namang mga guro ng Batas galing sa Jerusalem, at sinabi nila: "Sumasakanya si Beelzebul at sa tulong ng pinuno ng mga demonyo siya nagpapalayas sa mga ito."
Tinawag sila ni Jesus at nagsalita sa talinhaga: "Puwede bang Satanas ang mag-palayas sa Satanas? Kung may pagkakahati-hati ang isang kaharian, hindi na makatatayo ang kahariang iyon. At kung may sambahayang nagkakahati-hati, hindi na makatatayo ang sambahayang iyon. At kung si Satanas ang lumalaban sa kanyang sarili at nagkakahati-hati, hindi na siya makatatayo kundi malapit na ang wakas niya. Walang makapapasok sa bahay ni Malakas at makaaagaw sa lahat niyang mga gamit kung hindi muna itatali si Malakas. Saka lamang niya masasaid lahat ng ari-arian nito.
"Sinasabi ko sa inyo: patatawarin ang mga anak ng tao sa lahat-sa kanilang mga kasalanan at pati sa kanilang mga paglait sa Diyos kahit na marami man ang mga paglait nila sa Diyos. Ngunit kung may magsalita laban sa Espiritu Santo, kailanma'y di siya mapapatawad; kasalanang walang hanggan ang nasa kanya." Ang pagsasabi nila na may masamang espiritu siya ang tinutukoy ni Jesus.

Pagninilay-nilay
Piyesta ngayon ni Santo Tomas, na isa sa pinakamagaling at pinakadakilang teologo. Isinilang siya mga 1225 at nabuhay nang mga 50 taon. Ginamit niya ang maikling panahon ng kanyang buhay sa panalangin at pag-aaral upang maipaliwanag ang mga misteryo ng Diyos. Nang panahong iyon, puno rin ng kontrobersya ang kanyang pagteteolohiya dahil sa naiiba niyang pamamaraan. Ngunit ang teolohiya niya ang may pinakalamaking impluwensiya sa teolohiya ng Simbahan hanggang ngayon. Sa bandang huli ng kanyang buhay, tumigil siya sa pagsusulat dahil walang anumang makasasapat para mailahad niya ang yaman ng mga ibinunyag sa kanya ng Diyos.

balik calendario

Enero 29
Martes

Ika-3 na Linggo ng Taon

Unang Pagbasa: 2 S 6:12b-15, 17-19
Ebanghelyo: Mc 3:31-35

Dumating ang ina ni Jesus at ang kanyang mga kapatid; nakatayo sila sa labas at ipinatawag siya. Nakaupo si Jesus at napapaligiran ng mga tao nang may magsabi sa kanya: "Nasa labas ang iyong ina at mga kapatid; hinahanap ka nila." At sinabi ni Jesus sa kanila: "Sino ang aking ina at mga kapatid?"
At pagtingin niya sa mga nakaupo sa paligid niya ay kanyang sinabi: "Narito ang aking ina at mga kapatid. Kapatid kong lalaki at kapatid na babae at ina rin ang sumusunod sa kalooban ng Diyos."

Pagninilay-nilay
Ina-simpleng salita pero makahulugan para sa bawat isa sa atin. Hindi ba't ito ang salitang sinasabi ng bawat batang umiiyak? "Inay! Mama! Nay! Mommy!" Siya rin ang taong pinakamalapit at natatangi sa ating mga puso. Siya ang taong halos hindi pansin sa ating buhay ngunit siya namang hinahanap-hanap natin sa kanyang pagkawala.
Hindi naiiba sa atin si Jesus sa relasyon niya sa kanyang ina. Hindi pagtanggi sa kanyang ina ang kanyang sinabi kundi paanyaya sa lahat upang maging bahagi ng kanyang pamilya. Kung paanong sumunod si Maria sa Salita ng Diyos, gayon din naman tayo maaaring sumunod upang maging kapamilya tayo ni Jesus!

balik calendario

Enero 30
Miyerkules

Ika-3 na Linggo ng Taon

Unang Pagbasa: 2 S 7:4-17
Ebanghelyo: Mc 4:1-20

Nagsimulang magturo sa tabing-dagat at marami ang nagkatipon sa kanya. Kaya su-makay siya sa bangka at naupo. Nasa dagat siya at nasa tabing-dagat naman ang lahat. At marami siyang itinuro sa kanila sa tulong ng mga talinhaga. Sinabi niya sa kanila sa kanyang pagtuturo: Sinabi ni Jesus sa kanila sa kanyang pagtuturo:
"Makinig kayo! Lumabas ang manghahasik para maghasik. Sa kanyang paghahasik, may butong nahulog sa tabi ng daan. Dumating ang mga ibon at kinain ang mga iyon. Nahulog naman ang ibang buto sa batuhan at mababaw ang lupa roon. Madaling tumubo ang mga buto dahil hindi malalim ang lupa. Ngunit pagsikat ng araw, nasunog ito sa init at sapagkat walang ugat, natuyo ito. Nahulog ang iba pang buto sa mga tinikan. At nang lumago ang mga tinik, sinikil ng mga ito ang halaman at hindi namunga. Nahulog naman ang iba sa matabang lupa at namunga sa paglaki at paglago. May nagbunga ng tatlumpu, animnapu ang iba at sandaan ang iba pa."
At idinagdag ni Jesus: "Makinig ang may tainga!"
Nang wala na ang mga tao, tinanong siya ng mga nakapalibot sa kanya, na kasama ng Labindalawa tungkol sa mga talinhaga: "Bakit sa pamamagitan ng mga talinhaga ka nagsasalita sa kanila?"
At sinabi sa kanila ni Jesus: "Sa inyo ipinagkakaloob ang lihim ng kaharian ng Langit ngunit sa mga iyon na nasa labas, ang lahat ay sumasapit gaya ng talinhaga. Kaya tumitingin sila pero di nakakakita; nakaririnig pero di nakauunawa kaya naman di sila nagbabalik-loob at di pinatatawad."
At sinabi ni Jesus sa kanila: "Hindi ninyo nauunawaan ang talinhagang ito, kayat paano ninyo mauunawaan ang iba pa?
Ang Salita ang inihahasik ng manghahasik. Ang mga nasa tabi ng daan ay ang mga nahasikan ng Salita, na pagkarinig nila sa Salita ay agad na dumating ang Masama at inagaw ang nahasik sa kanila.
Gayundin ang nahasik sa batuhan. Pagkarinig nila sa Salita, kaagad nila itong tinanggap nang buong kasiyahan. Ngunit hindi ito nag-ugat sa kanilang kalooban at panandalian lamang. Kapag nagkaroon ng pagsubok at pag-uusig dahil sa Salita, agad-agad silang natitisod.
May iba pang nahasik sa mga tinikan. Ang mga ito ang nakarinig sa Salita. Ngunit pinapasok ang mga ito ng mga makamundong kabalisahan, ng pandaraya ng kayamanan at ng iba pang mga pagnanasa. Sinikil ng mga ito ang Salita at hindi na nakapagbunga.
Ang mga buto namang nahasik sa matabang lupa ay ang mga nakarinig sa Salita at isinasagawa ito. At nagbubunga sila ng sandaan, animnapu o tatlumpu."